اسلام آباد(مانیٹرنگ ڈیسک)سابق وزیر اعظم میاں محمد نوازشریف کی صاحبزادی اورن لیگ کی نائب صدر مریم نواز نے لیگی رہنما پر اپنی مخبری کرنے کا الزام عائد کر دیا۔ نجی ٹی وی پروگرام میں انکشاف کیا گیا ہے کہ حالیہ دنوں میں مریم نواز نے کئی لیگی رہنمائوں

سے ملاقاتیں کیں اور ایک رہنما پر الزام عائد کیا کہ آپ میری مخبری کرتے ہیں۔انہوں نے مذکورہ رہنما کو ڈانٹ بھی پلائی۔مریم نواز کی ڈانٹ کے بعد دیگر لیگی رہنما خائف دکھائی دیتے ہیں۔اسی حوالے سے گفتگو کرتے ہوئے سینئر صحافی رانا عظیم کا کہنا ہے کہ یہ واقعہ گلگت بلتستان کے انتخابات کے بعد کا ہے۔مریم نواز کو انتخابات سے پہلے ہی غصہ آیا ہوا تھا لیکن شکست کے بعد یہ غصہ بڑھ گیا۔مریم نواز نے ایک اجلاس کے دوران مسلم لیگ ن کے چند رہنمائوں کا نام لیا جن میں لاہور سے تعلق رکھنے والے رہنما بھی شامل تھے۔مریم نواز نے کہا کہ یہ لوگ ہماری باتیں آگے پہنچاتے ہیں۔یہ اس جگہ باتیں پہنچاتے ہیں جہاں نہیں پہنچنی چاہئیں۔مریم نواز لاہور کے دو تین رہنمائوں کا کھل کر نام لیتی ہیں،وہ کہتی ہیں یہ افراد مخبری کا کردار ادا کر رہے ہیں،یہ ہماری پارٹی میں غدار ہو سکتے ہیں۔اجلاس کے دوران ان تین لوگوں میں سے ایک بندہ موجود ہوتا ہے جو کہ بہت اہم رکن اسمبلی بھی ہیں۔مریم نواز انہیں باقاعدہ ڈانٹتی ہیں۔

جس پر انہوں نے کہا کہ میں یہ رویہ برداشت نہیں کروں گا ، پارٹی نہیں چھوڑوں گا لیکن اس رویے کے خلاف احتجاج کروں گا۔رانا عظیم نے مزید کہا کہ آنے والے دنوں میں لاہور سے اہم ترین رہنما نواز شریف کے بیانئے کی مخالفت کرتے نظر آئیں گے۔یہ رہنما لاہور کے جلسے سے قبل کھل کر سامنے آ سکتے ہیں۔واضح رہے کہ ن لیگ کو گلگت بلتستان الیکشن میں بری طرح شکست کا سامنا کرنا پڑا ہے ۔