پشاور(این این آئی)محکمہ اطلاعات و تعلقات عامہ خیبرپختونخوا نے ڈیجیٹائزیشن کی جانب اہم قدم اٹھاتے ہوئے پاکستان میں اپنی نوعیت کا پہلا آن لائن اشتہارات کا نظام بحال کر دیا۔ انٹیگریٹڈ ایڈورٹائزمنٹ مینجمنٹ سسٹم کا افتتاح وزیر اعلیٰ کے معاون خصوصی برائے اطلاعات و اعلیٰ تعلیم کامران بنگش نے جمعہ کے روز کر دیا۔افتتاحی تقریب سے خطاب کرتے ہوئے وزیراعلی خیبر
پختونخوا کے معاون خصوصی برائے اطلاعات کامران بنگش نے کہا کہ اشتہارات کی آن لائن وصولی، پراسسنگ اور اجراء کا ڈیجیٹل نظام تیار کر لیا ہے۔ جس کابنیادی مقصد سرکاری اشتہارات کے نظام کو جدید تقاضوں کے مطابق ہم آہنگ بنانا ہے۔ انہوں نے کہا کہ مذکورہ نظام کیلئے سافٹ ویئر محکمہ اطلاعات کے ائی ٹی سیکشن نے بنایا ہے۔ بغیر کسی لاگت کے سافٹ ویئر بنانا کفایت شعاری کی بہترین مثال ہے۔آن لائن اشتہارات کے نظام کی افادیت پر بات کرتے ہوئے معاون خصوصی کامران بنگش نے کہا کہ اب عوام کو سرکاری اشتہارات تک بہتر رسائی میں مدد ملے گی۔ جبکہ کلائنٹ ڈیپارٹمنٹس اور اخبارات کو اس نظام تک محدود رسائی دی جائے گی۔ انہوں نے مزید کہا کہ بلنگ اور پیمنٹ سمیت زیادہ تر امور آن لائن ہوں گے۔ اس کے ساتھ ساتھ تمام ریکارڈ ایک خودکار پراسس سے ڈیجیٹلی محفوظ ہوگا۔قبل ازیں معاون خصوصی کو سیکرٹری اطلاعات ارشد خان، ڈائریکٹر جنرل امداداللہ ڈائریکٹر پبلک ریلیشنز شمس اور ڈائریکٹر انفارمیشن ٹیکنالوجی زر علی خان نے نئے نظام کے بنیادی حدوحال اور پرانے نظام سے بہتر ہونے کے حوالے سے بریفنگ دی اور مختلف حصوں کا دورہ بھی کرایا۔ محکمہ اطلاعات کا ذکر کرتے ہوئے معاون خصوصی کامران بنگش نے ریمارکس دیئے کہ محکمہ اطلاعات کو مکمل طور پر ڈیجیٹائز بنا رہے ہیں کیونکہ وزیراعلی خیبرپختونخوا محمود خان خود اس
حوالے سے دلچسپی رکھتے ہیں صوبائی حکومت وزیراعلی محمود خان کی قیادت میں ای گورننس ممکن بنا رہی ہے۔ انہوں نے کہا کہ صحافی برادری اور میڈیا کے لیے تمام تر آسانیاں دینا ہماری ترجیح ہے۔ صوبے میں گڈ گورننس کی بات کرتے ہوئے معاون خصوصی برائے اطلاعات و اعلیٰ تعلیم کامران بنگش نے کہا کہ ای گورننس کے ذریعے گڈ گورننس کی جانب
بڑھ چکے ہیں۔جبکہ ہم دیگر صوبوں کو بھی آن لائن اشتہارات کے نظام کے حوالے سے تکنیکی تعاون فراہم کر سکتے ہیں۔ محکمہ اطلاعات و تعلقات عامہ کی کارکردگی کی تعریف کرتے ہوئے معاون خصوصی کامران بنگش نے کہا کہ انتہائی قلیل وسائل میں بھی محکمہ اطلاعات نے دیگر اداروں کی طرح اپنی کارکردگی بہترین بنائی ہے جو قابل تعریف ہے۔
