لاہور(پ ر) وزیراعلیٰ پنجاب سردار عثمان بزدارنے رات گئے بغیر پروٹوکول ملتان شہر کے مختلف علاقوں کا اچانک دورہ کیا۔ ملتان کی انتظامیہ بھی وزیراعلیٰ عثمان بزدار کے دورے سے لاعلم رہی۔ وزیراعلیٰ عثمان بزدار نے صفائی کی خراب صورتحال اور سٹریٹ لائٹس کی بندش کا نوٹس لیتے ہوئے متعلقہ اداروں کی کارکردگی پر شدید برہمی کا اظہار کیا اور حکام کی باز پرس کی۔ وزیراعلیٰ عثمان بزدار

نے بوسن روڈ، ملتان پبلک سکول اور بعض دیگر علاقوں میں کوڑا کرکٹ دیکھ کر سخت ناراضگی کااظہار کیا اور ملتان ویسٹ مینجمنٹ کمپنی کے چیف ایگزیکٹو آفیسر کی جواب طلبی کی گئی۔ وزیراعلیٰ کی ہدایت پر چیف ایگز یکٹو آفیسر ایم ڈبلیو ایم سی سے 2 روز میں تحریری وضاحت مانگ لی گئی۔ وزیراعلیٰ عثمان بزدار نے کہا کہ ملتان شہر کی صفائی کی ذمہ داری ایم ڈبلیو ایم سی پر عائد ہوتی ہے،کوتاہی ہر گز برداشت نہیں کروں گا۔ شہر میں صفائی کی صورتحال کا خود جائزہ لیا ہے۔ وارننگ کے باوجود بہتری نہ ہونا افسوسناک ہے۔ وزیراعلیٰ عثمان بزدار نے ہدایت کی کہ شہر میں سٹریٹ لائٹس کو ترجیحی بنیادوں پر فوری طو رپر درست کیا جائے۔ سٹریٹ لائٹس روشن نہ ہونے سے عوام کو دشواری کا سامنا کرنا پڑتا ہے۔ صفائی کی ابتر صورتحال اور فرائض سے غفلت برتنے پر ملتان ویسٹ مینجمنٹ کمپنی کے ڈپٹی منیجر عثمان خورشید کو معطل کر دیا گیا ہے اور ایڈیشنل ڈپٹی کمشنر ریونیو ایم ڈبلیو ایم سی کے ڈپٹی منیجر عثمان خورشید کے خلاف انکوائری کرکے 2 روز میں رپورٹ پیش کریں گے جبکہ سٹریٹ لائٹس کی بندش اور فرائض سے غفلت پر انچارج سٹریٹ لائٹس محمد نفیس احمد کو بھی معطل کر دیا گیا ہے۔ چیف آفیسر میٹروپولیٹن کارپوریشن ملتان نفیس احمد کے خلاف 2 روز میں انکوائری کر کے رپورٹ پیش کریں گے۔