اسلام آباد (این این آئی) پاکستان مسلم لیگ (ن) کی ترجمان مریم اورنگزیب نے سانحہ موٹروے کے مجرم کا پنجاب فارنزک سائنس لیبارٹری میں ڈی این اے میچ ہونے پر کہا ہے کہ تھینک یو نوازشریف اینڈ شہبازشریف، آپ کی محنت رنگ لائی، قوم کی بیٹی
کے مجرم پکڑے گئے۔ ہفتہ کو اپنے بیان میں انہوں نے کہاکہ خادم اعلی شہبازشریف نے پاکستان کی پہلی جدید ترین فارنزک لیبارٹری بنانے کا کارنامہ انجام دیا،شہبازشریف کا قائم کردہ جدید ترین ادارہ جرم اور مجرموں کو شکنجے میں کس رہا ہے۔ انہوں نے کہاکہ شہبازشریف کی قائم کردہ پنجاب فارنزک سائنس لیبارٹری کو دنیا میں دوسری سب سے جدید اور قابل اعتبار لیبارٹری کا درجہ دیاگیا،اس لیبارٹری نے مجرموں کا ڈیٹا جمع کیا، جدید ترین نظام کی بدولت موٹر وے پر ظلم کرنے والے کا سراغ لگایا جا سکا۔ انہوں نے کہا کہ پاکستان مسلم لیگ (ن) کے دور میں کئے گئے کام آج بول رہے ہیں، قوم کو انصاف دلارہے ہیں، آج یہ فارنزک لیب نہ ہوتی تو مجرم تک پہنچنا ممکن نہ ہوتا،نیب میں جرات ہے تو پنجاب فارنزک کے قیام پر بھی شہبازشریف پر مقدمہ بنادے؟،جدید آلات سے لیس پنجاب فارنزک پورے پاکستان میں اپنی نوعیت کی واحد اور منفرد لیبارٹری ہے،اس لیبارٹری نے دہشت گردوں کا پتہ لگانے اور انہیں کیفر کردار تک پہنچانے میں بھی تاریخی کردار اد اکیا ہے۔
