اسلام آباد (مانیٹرنگ ڈیسک)موٹر وے واقعہ میں مبینہ طور پر ملوث عابد علی سے متعلق معلوم ہوا ہے کہ وہ شادی شدہ ہے اور ایک بیٹی کا باپ بھی ہے،نجی ٹی وی سے گفتگو کرتے ہوئے ملزم کے والد نےکہا ہے اگر میرا بیٹا اس فعل میں ملوث ہے تو اسے مارنے پر کوئی اعتراض نہیں۔

والد نے تصدیق کی ہے کہ عابد علی دو روز قبل شام 6 بجے میرے گھر چھانگا مانگا آیا تھا۔عابد علی نے رات یہاں گزاری اور دوسرے دن سہ پہر روانہ ہوا۔بیٹے نے پسند کی شادی کی تھی ۔فیکٹری میں محنت مزدوری کرتا تھا۔ملزم نے صرف تیسری جماعت تک پڑھا۔دوسری جانب وزیر اطلاعات پنجاب فیاض الحسن چوہان نے دعویٰ کیا ہے کہ چند گھنٹوں میں موٹر وے کیس منطقی انجام تک پہنچا دیں گے۔ موٹر وے کیس کے حوالے سے ایک ویڈیو بیان میں فیاض چوہان نے کہا ہے کہ درندہ صفت انسان کو گرفتار کر لیا جائے گا، امید ہے چند گھنٹوں میں موٹر وے کیس منطقی انجام کو پہنچا دیں گے۔ موٹر وے کیس کی پیش رفت کے حوالے سے انہوں نے کہا کہ میڈیا وزیر اعلیٰ سیکرٹریٹ، وزیر اعلی پنجاب، وزیر اطلاعات اور وزیر قانون سے معلومات حاصل کریں۔ان کا کہنا تھا کہ میڈیا کے ذریعے عوام کو تازہ ترین صورتحال سے آگاہ کریں گے۔