کراچی(این این آئی)آڈیٹر جنرل آف پاکستان نے کراچی میں بارشوں کی ہنگامی صورتحال سے نمٹنے کیلئے حکومتی اداروں کی تیاریوں کے حوالے سے گزشتہ تین سال کا آڈٹ کرنے کی منظوری دے دی ہے۔اس حوالے سے آڈیٹر جنرل نے مراسلے جاری کردیئے ہیں جن کے مطابق
آڈیٹر جنرل آف پاکستان اسپیشل کیلئے خصوصی ٹیم تشکیل دے دی ہے جس کیلئے ٹی او آرز کی بھی منظوری دے دی گئی ہے۔ڈائریکٹر جنرل آڈٹ(ایل سی) سندھ کراچی کے ڈپٹی ڈائریکٹر کی سربراہی میں اس ٹیم میں ڈائریکٹ جنرل آڈٹ سندھ کے دو آڈٹ آفیسرز،دو اسسٹنٹ آڈٹ آفیسرز سمیت دیگر متعلقہ حکام شامل ہیں۔ڈائریکٹر جنرل آڈٹ(ایل سی) سندھ کراچی منظور کردہ گائیڈ لائنز میں یہ اسپیشل آڈٹ کروائے گا اور ڈائریکٹر جنرل آڈٹ نگرانی کریں گے۔بارشوں کی ہنگامی صورتحال سے نمٹنے کیلئے تیاریوں پر گزشتہ تین سال کے دوران ہونے والے اخراجات کا مکمل آڈٹ ہوگا۔ آڈٹ ٹیم مالی سال 2017-18 سے 2019-20 کا آڈٹ کرکے رپورٹ آڈیٹر جنرل کو جمع کروائے گی۔
