لاہور (این این آئی) پاکستان مسلم لیگ (ن) کے صدر شہباز شریف نے کہاکہ بجلی کی قیمتوں میں اضافہ ظلم ہے، عوام اس فیصلے کو مسترد کرتے ہیں ،وزیراعظم آٹا،گندم، چینی، دوائی، پٹرول چوری سے حواریوں کی جیب بھررہا ہے جبکہ غریب عوام پر ہر روز مزید بوجھ لادا جا رہا ہے ۔
بجلی کی قیمتوں میں اضافے پر شدید ردعمل کااظہار کرتے ہوئے شہبازشریف نے کہاکہ پٹرول کی قیمت نہ بڑھا کر ہیرو بننے کی کوشش کرنے والے بجلی کی قیمت بڑھا کر زیرو بن گئے ۔حکومت نے ایل این جی کی درآمد میں مجرمانہ تاخیر کی جس سے گیس کے بجائے تیل سے مہنگی بجلی پیدا ہوئی، اس کا زمہ دار کون ہے ؟ ۔معیشت، کاروبار، روزگار ٹھپ ہے اور حکومت ٹیکس پر ٹیکس لگا کر عوام سے جینے کا حق چھین چکی ہے ۔حکومت پہلے ہی ریکارڈ مقدار میں بجلی، گیس کی قیمتوں میں اضافہ کر چکی ہے ۔کے الیکٹرک کی مذمت کرنے والے وزیراعظم اور ان کے وزرا کس منہ سے خود مہنگی بجلی کا بم عوام پر گرا رہے ہیں ۔حکومت بجلی کی قیمتوں میں اضافہ واپس لے ورنہ شدید احتجاج کیا جائے گا، عوام کے ساتھ ظلم و زیادتی برداشت نہیں۔
