اسلام آباد(مانیٹرنگ ڈیسک)پیمرا نے 10محرم الحرام کی خصوصی ٹرانسمیشن کے دوران نفرت انگیز مواد نشر کرنے پر 24نیوز کا لائسنس فوری معطل کر دیا ، پیمرا نے 20اگست2020 کو تمام ٹی وی چینلز کو محرم الحرام کے حوالے سے ایڈوائزری جاری کی تھی
اور چینلز کو اپنی نشریات کے دوران ایسا مواد جو کہ بین المذاہب ہم آہنگی کو ٹھیس پہنچائے یا نفرت انگیزی اور فرقہ واریت پر مبنی ہو، نشر نہ کیا جائے۔ میسرز سینٹرل میڈیا نیٹ ورک پرائیویٹ لمیٹڈ(24نیوز)نے دس محرم الحرام کی خصوصی ٹرانسمیشن کے دوران نفرت انگیز مواد بغیر کسی ایڈیٹوریل کنٹرول کے نشر کیا اور پیمرا قوانین کی صریحاً خلاف ورزی کی۔ پیمرا کو سوشل میڈیا پر اس مواد کے خلاف شکایت موصول ہوئی ہیں جس پر اتھارٹی نے فوری کارروائی کرتے ہوئے پیمرا رڈیننس کے سیکشن (3 )30کے تحت24نیوز کا لائسنس معطل کر دیا ، کیونکہ نشر کئے گئے نفرت انگیز مواد سے ملک بھر میں نقص امن کا اندیشہ ہے۔ مزید برآں ، 24 نیوز کو اظہار وجوہ کا نوٹس جاری کرتے ہوئے 14روز میں جواب دہی کا حکم دیا ہے ، قانون کے مطابق چینل کو ذاتی شنوائی کا موقع فراہم کیا گیا ہے۔ چینل کا لائسنس انکوائری مکمل ہونے تک معطل رہے گا۔
