اسلام آباد (این این آئی)پاکستان مسلم لیگ (ن) کی ترجمان مریم اورنگزیب نے وزیراعظم کے بیان پر ردعمل کا اظہا رکرتے ہوئے کہاہے کہ ملکی ترقی منجمد کرکے آج کریڈٹ لیاجارہا ہے کہ کرنٹ اکائونٹ خسارہ کم ہوگیا،روپے کی قدر میں 45 فیصد کمی کرکے کہتے ہیں کہ معیشت درست سمت جارہی ہے ، شرم آنی چاہئے ۔
اپنے بیان میں انہوں نے کہاکہ عمران صاحب کا بیان ثبوت ہے کہ ان کا دماغ درست سمت میں کام نہیں کررہا ۔ انہوں نے کہاکہ قومی ترقی 5.8 سے 0.4 فیصد پر لاکر کہتے ہیں کہ معیشت درست سمت جارہی ہے ، شرم آنی چاہئے ۔ انہوں نے کہاکہ کرنٹ اکاونٹ خسارے کا کریڈٹ لینے والوں کو علم نہیں کہ انہوں نے قومی ترقی کا جنازہ نکال دیا ہے، تب یہ خسارہ کم ہوا ۔ انہوں نے کہاکہ کرنٹ اکائونٹ خسارے میں کمی کا مطلب ہے کہ بیرون ملک سے سرمایہ کاری ،مشینری، پلانٹس اور خام مال آنا بند ہوگیا ہے ۔ انہوں نے کہاکہ ملکی ترقی منجمد کرکے آج کریڈٹ لیاجارہا ہے کہ کرنٹ اکاونٹ خسارہ کم ہوگیا۔ انہوں نے کہاکہ عمران صاحب ایک سال کی اپنی بدترین کارکردگی کا اپنے دوسرے سال کی مزید نالائقی اور نااہلی سے موازنہ کرکے خوش ہو رہے ہیں ۔ انہوں نے کہاکہ موازنہ ہی کرنا ہے تو 2018 کا 2019 اور 2020 سے کریں تاکہ آپ کو آئینے میں سچائی نظر آئے۔ انہوں نے کہاکہ روپے کی قدر میں 45 فیصد کمی کرکے کہتے ہیں کہ معیشت درست سمت جارہی ہے ، شرم آنی چاہئے ۔ انہوں نے کہاکہ ملکی ترقی ، کاروبار ، روزگار ختم کرکے کہتے ہیں کہ معیشت درست سمت جارہی ہے ، شرم آنی چاہئے ۔ انہوں نے کہاکہ 45 فیصد روپے کی قیمت کم کرنے کے باوجود ٹیکس ہدف پورا کرنے کی تاریخی ناکامی کہتے ہیں کہ معیشت درست سمت جارہی ہے ، شرم آنی چاہئے ۔ انہوں نے کہاکہ ڈالر کا ریٹ بڑھانے کے باوجود بھی برآمدات مسلم لیگ ن کے آخری سال سے کم ہے کہتے ہیں کہ معیشت درست سمت جارہی ہے ، شرم آنی چاہئے ۔ انہوں نے کہاکہ دوسال میں 13000ارب کا قرض لیا، ایک نئی اینٹ نہیں لگائی، پھر کہتے ہیں کہ معیشت درست سمت جارہی ہے ، شرم آنی چاہئے۔
