سانگلہ ہل(آن لائن) سابق وفاقی وزیر امورکشمیرو پاکستان مسلم لیگ (ن) کے رکن قومی اسمبلی چوہدری برجیس طاہر نے کہا ہے کہ نیب میرا کچھ نہیں بگاڑ سکتی۔ میرا دامن صاف ہے۔ نیب مجھے جتنی بار بھی اپنے پاس بلا لے، وہ خود مایوس ہوگی۔ اگر کسی کے پاس میری درپردہ پراپرٹی کا علم ہے تو وہ سامنے لے آئے۔ آدھی پراپرٹی اسے دے دونگا۔ و سانگلہ ہل میں اپنے ڈیرے پر
پُرہجوم پریس کانفرنس سے خطاب کر رہے تھے۔ اس موقع پر صوبائی اسمبلی کے رکن میاں اعجاز حسین بھٹی(ایم پی اے) و دیگر بڑی تعداد میں مسلم لیگی رہنما بھی موجود تھے۔ چوہدری برجیس طاہر نے مزید کہا کہ موجودہ حکومت اپنی ہی بنائی ہوئی پالیسیوں میں ختم ہو جائیگی۔ ہم کسی قیمت پر اسرائیل کو تسلیم نہیں کریں گے اور نہ ہی مسئلہ کشمیر سے ایک قدم پیچھے ہٹیں گے۔ مقبوضہ کشمیر کی آزادی (ن) لیگ کا اولین مشن ہے۔ اس میں کوئی شک نہیں کہ مقبوضہ کشمیر پاکستان کی شہ رگ ہے ۔ انہوں نے مزید کہا کہ موجودہ حکومت کی طرف سے مقبوضہ کشمیر کی تبدیل کی جانے والی صورت کی جتنی بھی مذمت کی جائے کم ہے۔ انہوں نے کہا کہ میرے حلقے این اے 117میں میرے جاری شدہ سوئی گیس کے منصوبوں کے فنڈز موجودہ حکومت نے روک دئیے ہیں جو کہ عوام کے ساتھ بڑا ظلم اور زیادتی ہے۔ چوہدری برجیس طاہر نے مزید کہا کہ سانگلہ ہل سٹی سے سانگلہ موٹروے انٹرچینج تک جانے والی سڑک کی جان بوجھ کر تعمیر و مرمت نہیں کی جا رہی ہے۔ جس پر عوام کو سانگلہ موٹروے انٹرچینج تک جانا بہت مشکل ہے۔ موجودہ حکومت پاکستان کو جان بوجھ کر میاں نوازشریف اور سابقہ ن لیگی حکومت کے منصوبوں کو فیل کر رہی ہے۔ موجودہ حکومت دو سالوں میں مخالفین کو سیاسی انتقامی نشانہ بنانے کے سوا کچھ نہیں کر رہی ہے۔
