اسلام آباد (این این آئی) پاکستان مسلم لیگ (ن )پنجاب کے صدر سابق وزیر رانا ثنا اللہ نے کہا ہے کہ بظاہر ایسا لگتا ہے کہ نیب پیشی پر مریم نواز کی گاڑی پرگولیاں چلائی گئیں،اگرمریم نواز کی گاڑی بْلٹ پروف نہ ہوتی تو کوئی سانحہ بھی ہو سکتا تھا،سازش میں جو بھی ملوث ہوا اْس کے خلاف قانونی کارروائی عمل میں لائیں گے۔ نجی ٹی وی سے گفتگو کرتے ہوئے انہوںنے کہاکہ تفتیشی ماہرین سے مریم نواز کی گاڑی کا معائنہ کروا لیا ہے، اس سازش میں جو بھی ملوث ہوا اْس کے خلاف قانونی کارروائی عمل میں لائیں گے،
اگرمریم نواز کی گاڑی بْلٹ پروف نہ ہوتی تو کوئی سانحہ بھی ہو سکتا تھا۔رانا ثناء اللہ نے کہا کہ مریم نواز پر حملہ، کارکنان پر پتھراؤ اور ان کے سر پھاڑنے والوں کو جواب دینا پڑیگا۔ خیال رہے کہ مسلم لیگ (ن) کی نائب صدر مریم نواز کی قومی احتساب بیورو (نیب) میں پیشی کے دوران لیگی کارکنان اور پولیس میں جھڑپیں ہوئی تھیں۔نیب کے لاہور دفتر کے باہر پتھراؤ،لاٹھی چارج ،نعرے ،شیلنگ اور بد نظمی کی وجہ سے مریم نوازپراپرٹی کیس میں بیان ریکارڈ نہ کراسکیں اور نیب نے انہیں واپس بھیج دیا۔
