کراچی (مانیٹرنگ ڈیسک)سینئر تجزیہ کار حسن نثار نے کہا ہے کہ حکمرانوں کو جگانے کیلئے ہارن بجانا کافی نہیں اس کیلئے صور اسرافیل بھی پھونک دیا جائے تب بھی شاید یہ نہ جاگیں، بیرون ملک مقیم پاکستانیوں میں پاکستانیت زیادہ ہوتی ہے کیونکہ مقام بدلنے سے ماں تبدیل نہیں ہوتی،

عمران خان نے نئی بات نہیں کی کہ تبدیلی میں سسٹم رکاوٹ ہے، 14اگست 1947ء ہماری آزادی کا نہیں آقاؤں کی تبدیلی کا دن ہے۔نجی ٹی وی پروگرام میں گفتگو کرتے ہوئے حسن نثار کا کہنا تھا کہ اس ملک اور عوام کو سسٹم سے آزادی ملے بغیر حقیقی آزادی نصیب نہیں ہوگی، یہ نظام عجیب و غریب مکروہ گندہ غلیظ چوں چوں کا مربہ ہے، اس سسٹم میں بہت کچھ وہ ہے جو انگریزوں نے غلامو ں کیلئے وضع کیا تھا جبکہ کچھ ہماری شرارتیں اور کمینگیاں ہیں۔وزیراعظم کے سات معاونین خصوصی کی دہری شہریت کے حوالے سے حسن نثار کا کہنا تھا کہ پاکستانی دنیا میں جہاں بھی ہو وہ پاکستانی ہی ہے، بیرون ملک مقیم پاکستانیوں میں پاکستانیت زیادہ ہوتی ہے کیونکہ مقام بدلنے سے ماں تبدیل نہیں ہوتی، حسین حقانی جیسے لوگ چالیس پچاس لاکھ میں ایک آدھ ہوتے ہیں۔حسن نثار نے کہا کہ عمران خان جیسے آدمی کو معمولی کریڈٹ لینے کی ضرورت نہیں ہے، کورونا میں کمی اگر عمران خان کا کریڈٹ بھی ہے تو خود چپ رہیں دوسروں کوکہنے دیں۔لاہور میں تقرریوں اورتبادلوں سے لے کر ٹھیکوں تک کی بندربانٹ ہورہی ہے، پی ٹی آئی کا ایک وزیر مع اپنے برادران سارے گل کھلارہا ہے۔