اسلام آباد(آن لائن ) وفاقی حکومت کا بڑا پلان، ٹائیگر فورس اب گرین نگہبان بھی بنیں گے ۔ذرائع کے مطابق حکومت نے کلین گرین پاکستان منصوبے میں ٹائیگر فورس کی خدمات لینے کا فیصلہ کرلیا ہے ۔ ٹائیگر فورس کی ذمہ داریاں بڑھانے کا فیصلہ وفاقی و زیر و معاون خصوصی برائے ماحولیاتی تبدیلی ملک امین اسلم اور معاون خصوصی برائے امور نوجوانان عثمان ڈار کی ملاقات میں ہوا ۔ ٹائیگر فورس کو ملک بھر میں
پودے لگانے کی ذمہ داریاں بھی سونپی جارہی ہیں ۔ٹائیگرفورس سے پودے لگوانے کا پہلا تجربہ مون سون شجر کاری مہم میں کیا جائے گا۔ ذرائع کے مطابق وزیر اعظم آج( جمعہ کو) کہوٹہ میں پودا لگا کر شجر کاری مہم کا آغاز کریں گے۔ٹائیگر فورس کے جوان کہوٹہ میں بھی شجر کاری پودے لگائیں گے۔حکومت ٹائیگر فورس کو بعض مقامات پر پودے لگانے کا معقول معاوضہ دینے پر بھی غور کررہی ہے ۔ ٹائیگر فورس ملک بھر میں پودے لگائے گی اورساتھ درختوں کی حفاظت بھی کرے گی۔ وزیر اعظم نے بھی ٹائیگر فورس کی کلین گرین پاکستان میں خدمات پر آمادگی کا اظہار کردیا ۔ٹائیگر فورس کا ہر جوان گاوں، یونین کونسل، شہر اور تحصیل سطح پر پودے لگائے گا ۔ہر پودے کی حفاظت اور جنگلات کو محفوظ بنانے کی فرائض بھی انجام دے گا ۔ شہریوں کو پودے لگانے کی ترغیب دینا بھی ٹائیگر فورس کی ذمہ داریوں میں شامل ہوگا۔ٹائیگر فورس پودے لگانے میں بھی ضلعی انتظامیہ کے ساتھ مل کر کام کرے گا ۔ملک امین اسلم کاکہناتھاکہ ٹائیگرفورس گرین نگہبان بن گئی تو تمام ماحولیاتی اہداف عبور کرجائیں گے ۔ٹائیگر فورس گرین اکانومی کے ذریعے ملکی معیشت کو اوپر اٹھاسکتی ہے۔عثمان ڈار نے کہاکہ ٹائیگر فورس قیمتی اثاثہ ہے، اب ملکی ترقی میں بھی کردار ادا کرے گی۔خوشی ہے کہ ٹائیگر فورس شجر کاری مہم میں بھر پور حصہ لے گی۔ ٹائیگرفورس کو ایک کروڑ پودے لگانے کی ذمہ داری مل سکتی ہے۔
