اسلام آباد(مانیٹرنگ ڈیسک) پی آئی اے طیارہ حادثے کی ابتدائی تحقیقاتی رپورٹ پاکستان پہنچ گئی ۔ نجی ٹی وی کے مطابق ایئرکرافٹ ایکسیڈنٹ ٹیم کے سربراہ ایئرکموڈور عثمان غنی فرانس سے رپورٹ لائے ہیں جسےوزیراعظم عمران خان کے سامنے پیش کیا جائے گا۔
اس حوالے سے بتایا گیا ہے کہ ایئرکرافٹ ایکسیڈنٹ ٹیم کے سربراہ ایئرکموڈور عثمان غنی ایک خصوصی پرواز کی مدد سے پاکستان پہنچے ہیں جس کے بعد رپورٹ کو پیش کیا جائے گا۔واضح رہے ائیربس کے مطابق پی آئی اے کے حادثہ کا شکار ہونے والے طیارے کے فلائٹ ڈیٹا اور کاک پٹ وائس ریکارڈر سے اہم معلومات ملی ہیں۔چیف پروڈکٹ سیفٹی آفیسر ائیربس نے قومی ائیرلائن سمیت ائیربس طیارے استعمال کرنے والوں کو خط لکھا ہے جس میں کہا گیا ہے کہ پی آئی اے کے طیارے کو پیش آنے والے حادثے کی تحقیقات جاری ہیں، فلائٹ ڈیٹا ریکارڈر اور کاک پٹ وائس ریکارڈر کا تجزیہ کیا گیا اور سنا گیا جس میں سے اہم معلومات ملی ہیں۔خط میں کہا گیا ہے کہ تحقیقات میں پاکستانی ائیرکرافٹ ایکسیڈنٹ انویسٹی گیشن بورڈ کے نمائندے بھی شریک ہیں، تفتیشی ٹیم کے ساتھ مکمل تعاون کر رہے ہیں تاہم ائیربس کے پاس تحقیقات کے اس مرحلے میں آپریٹرز کے لیے کوئی خاص حفاظتی سفارشات نہیں ہیں۔
