لاہور( این این آئی )پاکستان مسلم لیگ (ن) کے صدر و قائد حزب اختلاف محمد شہبازشریف نے حاجی پیر اور سنکھ سیکٹرز میں بھارتی فوج کی بلااشتعال فائرنگ اور گولہ باری کی شدید مذمت کرتے ہوئے کہا ہے کہ بھارت خطے میں جنگ بھڑکانے کی حماقت سے باز آئے ۔ اپنے بیان میں انہوںنے زخمی ہونے والی خاتون شہری سے ہمدردی کا اظہار کرتے ہوئے کہا کہ بھارتی انتہاپسند حکمرانوں کے سر پر جنگ کا بھوت سوار ہے

،بھارت 27 فروری 2019 کو دئیے جانے والے پاکستانی جواب کو یاد کرے ،دنیا کورونا وباسے نمٹنے میں مصروف ہے لیکن بھارت انسان دشمنی کے رویہ پر کاربند ہے ۔ انہوں نے کہا کہ بھارتی حکمران انسانوں کی مدد کے مرحلے پر بھی تعصب کی آگ میں جل رہے ہیں جس پر افسوس ہے ۔ شہباز شریف نے ایل او سی پر رہنے والی عام آبادی کے جذبے اور قربانیوں کو خراج تحسین پیش کرتے ہوئے زخمی خاتون کی جلد صحتیابی کے لئے دعا کی ۔

موضوعات:شہباز شریف