کراچی(این این آئی)شہر قائد سے تعلق رکھنے والے نوجوان نے کرونا لاک ڈائون کا فائدہ اٹھاتے ہوئے شادی کی اور دلہن کو موٹرسائیکل پر رخصت کر کے ہی گھر لے آیا۔ذرائع کے مطابق کراچی کے علاقے شاہ فیصل سے تعلق رکھنے والا ریحان نامی دلہا گلستان جوہر سے اپنی دلہن کو موٹرسائیکل پر بٹھا کر لے آیا۔ دلہا دلہن عروسی جوڑے میں تھے

اور موٹرسائیکل ریحان خود ہی چلا رہا تھا۔ریحان کے مطابق لاک ڈائون کی وجہ سے شادی کو انتہائی مختصر رکھا اور نکاح اور بارات کی تقریب میں صرف 6 افراد نے شرکت کی۔ دلہا نے بتایا کہ لاک ڈائون کی وجہ سے شادی سادگی سے کرنے کا موقع ملا ۔ریحان نے بتایاکہ جب دلہن کو لے کر گھر پہنچ گیا تو خاتون کے ساتھ ڈبل سواری پر پابندی کا علم ہوا ورنہ اگر پہلے خبر ہوتی تو رخصتی کیلئے کچھ اور بندوبست کرتا۔یاد رہے کہ سندھ حکومت نے کرونا کے پیش نظر صوبے بھر میں دفعہ 144 نافذ کی ہوئی ہے جس کے تحت تین سے زائد افراد کے جمع ہونے پر پابندی ہے۔