کراچی(این این آئی) سگی بہنوں نے لالچ میں اندھی ہوکر بھائی کی زندگی اجیرن کردی ، شرافی گوٹھ تھانے میں بلواکر کاغذ پر انگوٹھے کے نشان اور دستخط کروالئے، پولیس افسر نے ڈرادھمکاکرکہا ایک ہفتے میں مکان میں سے حصہ دو ورنہ جیل بھیج دوںگا،بہن اوراس کے بیٹے نے مکان پر تالاڈال دیا ۔
یہ باتیں مانسہرہ کالونی لانڈھی کے رہائشی فضل الرحمان ولدمیرزمان نے اعلیٰ حکام کو ارسال کردہ درخواست میں درج کی ہیں۔فضل الرحمان کے مطابق اس کی بہنیں خورشیدہ بی بی زوجہ لال خان اور رضیہ بی بی زوجہ محمودزبردستی اس کے مکان میں سے حصہ ماگ رہی ہیں جبکہ مذکورہ مکان میں نے مسقط میں روزگارکمانے کے دوران رقم بھیج کر بنوایاتھااور والد صاحب اس وقت انتقال کرچکے تھے،لہٰذااس جائیدادمیں بہنوں کا حصہ نہیں بنتا،مسقط سے میں اپنے ماموں زاد ایوب کو رقم بھیجتاتھاجو میری والدہ کو دیتاتھا،میری والدہ نے اس رقم سے پلاٹ خریدااورگھر تعمیرکروایا۔انہوں نے بتایاکہ والد کے انتقال کے بعدمیں نے اپنی بہنوں کو باپ بن کر پالاہے،دونوں بہنوں کی شادیاں کرائیں، ایک معذوربھائی کے بھی تمام اخراجات میرے بھیجے ہوئے پیسوں سے اداکیئے جاتے تھے۔انہوں نے درخواست کی ہے کہ متعلقہ حکام فوری طورپر نوٹس لیں ،میری زندگی کو شدیدخطر ہ ہے،سگی بہنوں کا خون سفید ہوگیاہے،مکان کے لالچ میں وہ کسی بھی حدتک جاسکتی ہیں۔ان لوگوں نے دھوکے سے مجھ سے مکان کی فائل بھی ہتھیالی ہے اور اسے بیچنے کے لئے خریدارلارہے ہیں۔
