راولپنڈی (این این آئی)پی آئی اے پر وی آئی پی شخصیات کو پاکستان لانے کے معاملہ پر ترجمان پی آئی اے نے سختی سے تردیدکرتے ہوئے کہا ہے کہ پی آئی اے کا طیارہ خصوصی طور پر کچھ اہم افراد کو لینے برطانیہ جانے کی اطلاعات درست نہیں ۔ترجمان نے کہا کہ اپریل 3 سے اپریل 13 تک پی آئی اے تقریبا 1600 افراد کو وطن واپس لے کے آیا
جس میں کثیر تعداد برطانیہ سے آنے والے مسافروں کی تھی ۔ترجمان عبداللہ خان نے کہا کہ اس بات کی سختی سے تردید ہے کہ پروازیں صرف چند مخصوص افراد کو لے کے آئیں ،پی آئی اے کے پروازوں کے ٹکٹ پی آئی اے کے دفاتر اور ویب سائیٹس پر دستیاب تھے ۔پی آئی اے کی جانب سے بارہا میڈیا پہ بھی اعلان جاری کئے گئے کہ تمام خواہشمند افراد فوری طور پر بکنگ کروائیں ۔ ترجمان پی آئی اے نے کہا کہ پی آئی اے قومی پرچم بردار ائیر لائن ہے ، اپنی ذمہ داریوں کو غیر جانبداری، سیاسی وابستگی اور مکمل ذمہ داری سے قومی خدمت کے جذبے سے سرانجام دیتی ہے ، بے بنیاد رپورٹس پی آئی اے کی ان ہنگامی حالات میں سرانجام دی گئی خدمات کو دانستہ طور پر نقصان پہنچانے کی کوشش ہے۔ ترجمان نے کہا کہ پی آئی اے کی جانب سے فراہم کی جانے والی خدمات کو مسافروں اور غیر ملکی حکومتوں کی جانب سے خاص طور پر سراہا جارہا ہے ۔ترجمان پی آئی اے نے کہا کہ پی آئی اے انتظامیہ پہلے ہی تمام پروٹوکول سروس ختم کر چکی ہے اور اپنے اس فیصلے پر سختی سے کاربند ہے اور اس کی کوئی خلاف ورزی نہیں کی جارہی ۔
