اسلام آباد (این این آئی)وفاقی حکومت کے ترجمان شہباز گل نے کہا ہے کہ مشکل کی اس گھڑی میں صرف میڈیا پر اعلانات سے نہیں اپنے عمل سے خود کو لیڈر ثابت کریں۔پاکستان تحریک انصاف کے رہنما شہباز گل نے اپنے ایک بیان میں سندھ حکومت پر تنقید کرتے ہوئے کہا کہ کورونا کے تدارک کے لیے سندھ حکومت نے 3 نمایاں اقدام کیے ہیں، سندھ کے ان اقدامات میں احساس امدادی پروگرام پر اپنا نام لکھنا،
روزسیاسی بیان داغنا اور مخالف سیاسی ورکرز پر تشدد کرنا شامل ہے۔شہباز گل نے کہا کہ بیان بازی میں دنیا میں پہلا نمبر جبکہ حقیقت میں سب سے زیادہ برا حال سندھ کا ہے، سندھ میں روزانہ کے صرف 500 ٹیسٹ، وبا کا زیادہ پھیلائو، بغیر تیاری لاک ڈائون ہے، لگتا ہے 8 ارب گھر پر ہی بانٹ لیے، کسی کو کانوں کان خبر نا ہونے دی۔شہباز گل نے کہا کہ سندھ کے تاجر اور غریب عوام سبھی سراپا احتجاج ہیں، اپنی حکمت عملی کی بدترین ناکامی پروفاق کے پیچھے نا چھپیں۔انہوں نے کہا کہ اختلاف ہے تو اپنا فیصلہ کرنے کا حق بھی، پر اس موقع پر سیاست نا کریں، پی پی پی نے یہ تاثر دیا ہے کہ وفاق نے ہمیں کوئی فیصلہ لینے کے لیے مجبور کیا ہے۔شہباز گل نے کہاکہ حضور اٹھارویں ترمیم کے بعد آپ کے ان فیصلوں کا اختیار آپ کے پاس ہے، آپ کا تو کل تک یہ دعویٰ تھا کہ سب آپ کو فالو کرتے ہیں، اتنے دن سیاست کی ہے تو اب کچھ دن کام بھی کرلیں کیونکہ عوام حقیقت جان گئی ہے۔انہوں نے حکومت سے متعلق بات کرتے ہوئے کہا کہ ذخیرہ اندوز اور اسمگلر پہلے قانون میں سقم کی وجہ سے سزائوں سے بچ نکلنے میں کامیاب ہوجایا کرتے تھے مگر اب حکومت کے راڈار پر ہیں۔
