اسلام آباد (این این آئی)چیئرمین رویت ہلال کمیٹی مفتی منیب الرحمان کے مساجد پر لاک ڈاؤن کا اطلاق نہ ہونے سے متعلق متعلق بیان پر وفاقی وزیر فواد چوہدری نے ردعمل دیتے ہوئے انہیں تنقید کا نشانہ بنایا اور کہاہے کہ مفتی منیب کو اتنا بڑا چاند نظر نہیں آتا تو اتنا چھوٹا کورونا کہاں سے نظر آئیگا ۔ وفاقی وزیر برائے سائنس و ٹیکنالوجی فواد چوہدری نے اپنی ٹوئٹ میں کہا کہ’ مولانا منیب الرحمان ہمارے بزرگ ہیں احترام ہے لیکن ان کو اتنا بڑا چاند نظر نہیں آتا تو اتنا چھوٹا کورونا وائرس کہاں سے نظر آنا ہے۔

فواد چوہدری نے کہا کہ وزارت مذہبی امور کی توجہ دلائی گئی ہے کہ آپ کی وزارتی کمیٹی کے سربراہ اگر حکومتی احکامات کا یوں مذاق اڑائیں گے تو باقیوں سے کیا توقع‘؟۔وفاقی وزیر نے دعویٰ کیا کہ جہاں تک رمضان کا تعلق ہے تو 24 اپریل کو رمضان کا چاند نظر آجائے گا اور انشا اللہ 25 اپریل کو پہلا روزہ ہو گا۔ انہوں نے کہا کہ پہلے ارادہ تھا اس بار لوگوں کو چاند دیکھنے کیلئے اکٹھا کریں گے لیکن اب کورونا نے ہر اجتماع منسوخ کرا دیا ہے، انشاللہ اگلے سال موقع ملا تو چاند رات کی تقریبات کریں گے۔

موضوعات:فواد چوہدری