بہاول پور( آن لائن)بہاول پور میں کورونا کے پھیلنے کا شدید خطرہ لاحق ہو گیا۔ دکانداروں نے لاک ڈائون کی دھجیاں بکھیر کے رکھ دیں۔ اندرون و بیرون شہر دکانیں کھول کر ہجوم اکٹھے کر لئے۔ شہریوں میں شدید خوف و ہراس پولیس دفعہ 144پر عملدرآمد میں ناکام ہو گئی۔ دکاندار آدھے شٹر گرا کر کاروبار میں مصروف ہیں۔ انتظامیہ نے بھی چپ سادھ لی۔ بہاول پور میں 70فیصد دکانداروں نے
اعلانیہ اور نصف شٹر گرا کر لاک ڈائون کی خلاف ورزی کرتے ہوئے اپنے کاروبار سجا لئے ہیں۔ اندرون اور بیرون شکارپوری گیٹ کے علاوہ مچھلی بازار، شاہی بازار، چوک بازار، فتح خاں بازار میں کاروبار زندگی رواں کر لیا ہے جس کے باعث ہر طرف چہل پہل اور رش کا سماں ہے۔ سماجی فاصلوں کے حوالے سے اقدامات کی بھی دھجیاں اڑائی جا رہی ہیں۔ دکانداروں نے دفعہ 144کی علی الاعلان خلاف ورزی شروع کر دی ہے جبکہ پولیس بھی خاموش تماشائی بنی کھلی آنکھوں سے یہ نظارہ دیکھنے میں مصروف ہے۔ اس سے شہر بھر میں کورونا کے پھیلنے کے شدید خطرات لاحق ہو گئے ہیں اور لوگوں میں خوف وہراس پایا جاتا ہے۔ اس سے یہ بات بھی ثابت ہو سکتی ہے جس کا عالمی ادارے خدشہ ظاہر کر رہے ہیں کہ پاکستان میں کورونا وائرس پھیلنے کا شدید خطرہ ہے۔ سرائیکی چوک میں بھی 60فیصد سے زائد دکانیں کھلی ہیں۔ اسی طرح یونیورسٹی چوک اور اندرون فرید گیٹ بھی شٹر ڈائون نہیں کیا جا رہا۔ انتظامیہ بھی اس حوالہ سے اقدامات پر عملدرآمد میں ناکام دکھائی دے رہی ہے۔ اگر یہ صورتحال برقرار رہی تو بہت بڑا انسانی المیہ رونما ہو سکتا ہے۔ شہریوں نے کمشنر بہاول پور، آر پی او، ڈپٹی کمشنر اور ڈی پی او سے فوری نوٹس لے کر لاک ڈائون پر موثر عملدرآمد کا مطالبہ کیا ہے۔
