نیویارک (این این آئی) پاکستان کے نامور ڈیزائنر حسن شہریار یاسین (ایچ ایس وائے) نے حال ہی میں اداکار عثمان خالد بٹ کے ہمراہ انسٹاگرام پر لائیو سیشن رکھا اور اس دوران ان دونوں نے دنیا بھر میں پھیلی وبا کورونا کے حوالے سے بات کی۔حسن شہریار یاسین نے اس دوران انکشاف کیا کہ ان کے دو قریبی دوست بھی اس وائرس کا شکار ہوئے تھے جن کا انتقال ہوگیا۔
ڈیزائنر کے مطابق یہ دونوں امریکا میں اس وائرس کا شکار ہوئے، ان میں سے ایک کا تعلق نیویارک سے تھا۔لائیو سیشن کے دوران دونوں نے لاک ڈاؤن کے باعث لوگوں کی ذہنی صحت پر پڑنے والے اثرات پر بھی بات کی۔حسن شہریار یاسین کا اس دوران کہنا تھا کہ وہ افراد جنہیں روزانہ باہر جانے کی عادت ہو، یا جو ہر وقت کاموں میں مصروف رہتے ہوں ان کیلئے یہ لاک ڈاؤن کافی مشکل ہوگا۔انہوں نے کہا کہ لوگوں کو سمجھنے کی ضرورت ہے کہ لاک ڈاؤن نافذ کیا جاچکا ہے اور اس دوران کوئی بھی ڈپریشن کا شکار ہوسکتا ہے۔حسن شہریار کے مطابق میں نے اس حوالے سے شہریار منور اور ماورا حسین سے بھی بات کی، دونوں ہی نے مجھے بتایا کہ وہ مداحوں کی جانب سے دیے منفی پیغامات پڑھ پڑھ کر تھک چکے ہیں کیوں کہ وہ ان پر کام نہ کرنے کا الزام لگارہے ہیں۔انہوں نے لوگوں کو مشورہ دیا کہ اس وقت ایک دوسرے کے ساتھ اچھا سلوک کریں، میں نے اپنے دو دوستوں کو اس وائرس کی وجہ سے کھو دیا، لوگ ابھی بھی اس مسئلے کو سنجیدگی سے نہیں لے رہے اور دوسروں کو نیچا دکھانے کی کوشش کررہے ہیں۔
