اسلام آباد(نیوز ڈیسک) سابق وزیراعظم شاہد خاقان عباسی نے کہا ہے کہ موجودہ حکومت نے 5 سال پورے کئے تو قرضے دوگنے ہو جائیں گے، جہانگیر ترین سے پرانی دوستی، ملاقات کے لئے تیار ہیں، لیکن ہارس ٹریڈنگ جیسے کسی کھیل کا حصہ نہیں بنیں گے جس سے سیاست بدنام ہو،
چینی سبسڈی سکینڈل میں سارا ملبہ جہانگیر ترین پر ڈال کر وزیراعظم، اسد عمر اور عثمان بزدار کو بچایا گیا ہے۔ نجی ٹی وی سے گفتگو کرتے ہوئے مسلم لیگ ن کے رہنما شاہد خاقان عباسی نے کہا ہے کہ خواجہ سعد رفیق اور چودھری پرویز الہیٰ کے درمیان پرانا تعلق ہے ان کی حالیہ ملاقات کے بارے میں علم نہیں تھا۔ شاہد خاقان عباسی نے کہا کہ جہانگیر ترین کا معاملہ تحریک انصاف کا اندرونی مسئلہ ہے۔ پنجاب میں وزراء خوش نہیں ہیں وزیراعلیٰ پنجاب عثمان بزدار ناکام ثابت ہوئے ہیں انہوں نے کہا کہ جہانگیر ترین شہباز شریف کے ساتھ پہلے بھی کام کر چکے ہیں میری بھی جہانگیر ترین کے ساتھ پرانی دوستی ہے۔ ان کے ساتھ ملاقات کے لئے تیار ہیں لیکن ہمیں ہارس ٹریڈنگ کے معاملات میں نہیں پڑنا چاہئے، ایسے کسی کھیل کا حصہ نہیں بنیں گے جس سے سیاست بد نام ہو تا ہم سیاسی جماعتیں سب سے بات کرنے کو تیار ہوتی ہیں انہوں نے کہا کہ چینی سبسڈی رپورٹ میں وزیراعظم عمران خان، وزیراعلیٰ پنجاب عثمان بزدار اور سد عمر کو بچا کر سارا ملبہ جہانگیر ترین پر ڈالنے کی کوشش کی گئی ہے، شاہد خاقان عباسی نے کہا کہ موجودہ حکومت نے 5 سال پورے کئے تو قرضے دوگنا ہو جائیں گے۔
