حیدرآباد(آن لائن) حیدرآباد میں کورونا وائرس تیزی سے پھیلنے لگا، تین کیس مثبت آنے کے بعد شہریوں میں خوف وہراس پھیل گیا۔ تفصیلات کے مطابق میمن سوسائٹی کی خاتون مہ جبین کو ٹیسٹ مثبت آ نے کے بعد ڈی ایچ او کی قرنطینہ سینٹر میں منتقل کردیا ۔
لیاقت کالونی کے رہائشی اطہر قریشی کا کورونا ٹیسٹ پازیٹو آنے کے بعدمذکورہ شخص کوہسار ہسپتال لطیف آباد کے قرنطینہ سینٹر منتقل کردیا گیاہے جس کے بعد ڈی ایچ او ٹیم کی جانب سے کورونا وائرس سے متاثرہ شخص اطہر قریشی کی فیملی کے دیگر افراد کے ٹیسٹ بھی کئے جا رہے ہیں،ڈی ایچ او ٹیم کے مطابق کوروناسے متاثر شخص اطہر قریشی ایک سرکاری بینک کا کیشیئرہے اور اس نے تین روز قبل راجپوتانہ ہسپتال سے کورونا وائرس کا ٹیسٹ کروایا تھا جس کی رپورٹ مثبت آنے کے بعد ڈی ایچ او ٹیم حرکت میں آئی اور جمعہ کی دوپہر پولیس اہلکاروں کے ہمراہ اطہر قریشی کے گھر پہنچ کر گھر میں موجود افراد کا ٹیسٹ لینا شروع کردیاہے ۔قاسم آباد کے رہائشی غلام حسین خشک کے گھر پہنچ کراس کا کورونا کا ٹیسٹ کیا جو کہ پازیٹو آیا جس پر ڈی ایچ او کی ٹیم نے فوری طور پرمتاثرہ شخص غلام حسین کو سول ہسپتال کے آئسو لیشن وارڈ میں شفٹ کرکے اس شخص کے جن افراد سے رابطے تھے اُن کے بارے میں بھی معلومات حاصل کرنا شروع کردی ہیں ، غلام حسین خشک 20فروری کو ایران سے پاکستان آیا تھا ۔
