کراچی(این این آئی) وزیر اعلی سندھ سید مراد علی شاہ نے آئی جی پولیس کو صوبے میں لاک ڈائون کو مزید سخت کرنے کی ہدایت کی ہے۔جمعہ کووزیراعلی سندھ سید مراد علی شاہ کی صدارت اہم اجلاس ہوا، جس میں لاک ڈائون کی صورتحال کا جائزہ لیا گیا۔

اجلاس میں وزیر صحت ڈاکٹر عذرہ پیچوہو، چیف سیکرٹری سید ممتاز شاہ، ڈی جی رینجرزسندھ میجر جنرل عمر احمد بخاری، آئی جی پولیس مشتاق مہر، سیکرٹری داخلہ عثمان چاچڑ، کور فائیو کے بریگیڈیئر سمیع شریک ہوئے۔ اجلاس کے شرکاء کو بتایا گیا کہ سندھ میں کورونا وائرس کے مزید کیسز سامنے آئے ہیں، صوبے میں کورونا کے تصدیق شدہ مریضوں کی تعداد 440 ہوگئی ہے، ان میں 151 سکھر فیزون، 114 سکھر فیز2 اور7 لاڑکانہ میں رکھے گئے زائرین ہیں۔وزیراعلی سندھ نے آئی جی پولیس کو لاک ڈائون کو سخت کرنے کی ہدایت دیتے ہوئے کہا کہ لوگ ابھی تک شہر میں گھوم رہے ہیں، لوگوں کا تعاون عوام کی صحت کا ضامن ہے، اس لئے عوام لاک ڈائون اور حکومت کے فیصلوں کا احترام کریں، عوام کو ایک مرتبہ ان کے اپنے بچوں، خاندان اور صوبے اور ملک کے عوام کی صحت کی خاطر لاک ڈائون پر عمل کرنے کی درخواست کرتا ہوں۔مراد علی شاہ نے کہا کہ ہم نے خوشی سے نہیں بلکہ تکلیف سے مساجد میں جماعت کو بہت محدود کروایا ہے، یہ فیصلہ عوا م کی صحت کے پیش نظر علماء کی مشاورت سے کیا، میں نے خود گھر میں جمعۃ المبارک کی نماز مسجد سے پیش امام کی آنے والی آواز سے ادا کی۔

موضوعات:سید مراد علی شاہ