سرگودھا(این این آئی)ملک بھر میں لاک ڈائون کے باعث تین روز سے گھروں میں محصور لوگوں نے اللہ تعالی کے حضور سجدہ ریز ہو کر اپنے گناہوں اور کورونا وائرس سمیت بیماریوں سے نجات کے لئے توبہ استغفار کا ورد شروع کر دیا اور رات بھر سے جاری بارش کو اللہ کی رحمت اور وبائی امراض سے نجات قرار دے دیا۔
ٹی وی چینلز کو چاہئے کہ وہ عوام کو بتائیں کہ اس موقع پر عوام اللہ کی طرف رجوع کریں نماز پنجگانہ کی پابندی کریں ‘توبہ واستغفار کریں‘قرآن پاک کی زیادہ سے زیادہ تلاوت کریں اور احادیث مبارکہ کا مطالعہ کریں،ذرائع کے مطابق حکومت کی طرف سے لاک ڈاون میں مزید 14 روز کے اضافہ کے فیصلہ پر لوگ تیسرے روز بھی اپنے اپنے گھروں میں محصور رہے اور اللہ تعالی کی طرف سے وفقہ وقفہ سے رات بھر بارش کا سلسلہ جاری رہا۔اس لاک ڈاون کے باعث مساجد میں رش کم اور لوگوں کے گھروں میں محصور ہو کر عبادات کا سلسلہ شروع ہو گیا اور لوگوں کی بڑی تعداد پنجگانہ نماز کے ساتھ دورکعت نوافل توبہ ،نوافل مغفرت، نوافل نجات،نوافل رحمت پڑھتے ہوئے توبہ استغفار میں مشغول ہو گیاورتوبہ استغفار کی تسبیحات کر کے کروناوائرس سے نجات اور اس وباء سمیت دیگرامراض میں مبتلاافراد کی صحت اوراپنے گناہوں کی معافی مانگنے لگے اور رات بھر جاری بارش کو اللہ تعالی کی طرف سے باران رحمت اور وبائی امراض سے نجات قرار دیتے ہوئے اظہار مسرت کرتے رہے۔بدقسمتی سے چند ٹی وی چینل لوگوں کو اس موقع پر بھی نفسیاتی ماہرین سے رجوع کرنے کا کہہ رہے ہیں جبکہ یہ موقع اللہ کی طرف رجوع کرنے کا ‘توبہ استغفار کرنے اور زیادہ سے زیادہ قرآن پاک کی تلاوت کا ہے اس کے علاوہ احادیث مبارکہ کا مطالعہ کیا جائے ۔
