اسلام آباد (این این آئی)ترجمان عوامی نیشنل پارٹی زاہد خان نے کہا ہے کہ حکومت اور نیب کا گٹھ جوڑ سب کے سامنے ہے،سلیکٹڈ حکمرانوں کو وہ دور یاد نہیں جب یہ حزب اختلاف میں تھے،جب موجودہ حکمران اپوزیشن میں تھے ،تب میڈیا انھیں سپورٹ کر رہا تھا ، موجودہ سیلیکٹڈ حکمرانوں کو تنقید برداشت نہیں ہوتی ،سلیکٹڈ وزیر اعظم سب کو ہٹلر کہتے تھے ۔
ایک بیان میں انہوں نے کہاکہ حقیقت میں سلیکٹڈ وزیر اعظم کا رویہ خود ہٹلر جیسا ہے ،چیئرمین نیب تو ویڈیو اسکینڈل کے بعد سیلیکٹڈ حکمرانوں کے سامنے لمبا لیٹ گیا ہے ۔ انہوںنے کہاکہ اپوزیشن کے سیاستدان تو پہلے ہی حکومت کے نرغے میں تھے ،اب میڈیا کے بڑے گروپ کو بھی حکومت نے نرغے میں لے لیا ہے۔ انہوںنے کہاکہ میر شکیل الرحمان کی گرفتاری سے پورے میڈیا کی آزادی کو صلب کر لیا گیا ہے،یہ دنیا میں کہتے ہیں کہ ہمارے ملک میں میڈیا گرفتار ہے۔ انہوکںنے کہاکہ اور دنیا دیکھ رہی ہے کہ اس حکمران سے نہ صحافی محفوظ ہیں نہ اپوزیشن ، نہ میڈیا ہاوسز ۔ انہوکںنین کہاکہ سلیکٹڈ وزیر اعظم انتقام سے بھرا ہوا ہے،معلوم نہیں کہ یہ عوام سے کیوں انتقام لے رہا ہے۔ انہوںنے کہاکہ یہ کہنا کہ نیب آزاد ہے ایسا ہی ہے جیسے دن کو رات کہنا ،ہم میر شکیل الرحمان کی گرفتاری کی مذمت کرتے ہیں ،عدالت حکومت کے اس رویے کا نوٹس لے۔ انہوںنے کہاکہ سلیکٹڈ حکمران عدالت کے کندھے پر رکھ کر بندوق چلا رہے ہیں ،ایسا نہ ہو کہ حکومتی اقدامات سے ملک انارکی کی جانب چلا جائے۔انہوںنے کہاکہ سلیکٹر ز کو بھی اس حکومت کے حوالے سے رویہ تبدیل کرنا ہو گا ،موجودہ سلیکٹڈ حکمران نہ ملک ، نہ قوم ، نہ جمہوریت ، نہ میڈیا کے مفاد میں ہیں۔
