اسلام آباد (این این آئی)اسلام آباد ہائی کورٹ میں وفاقی وزیر فیصل واوڈا نااہلی کیس سماعت کے لیے مقرر کر دی گئی ،اٹھارہ مارچ کو سماعت ہوگی ۔ منگل کو رجسٹرار اسلام آباد ہائیکورٹ نے کاز لسٹ جاری کردی جس کے مطابق جسٹس عامر فاروق اٹھارہ مارچ کو فیصل واوڈا نااہلی کیس کی سماعت کریں گے ۔عدالت نے فیصل واوڈا، کابینہ ڈویژن، سیکرٹری قانون الیکشن کمیشن سے جواب طلب کررکھا ہے،عدالت نے فیصل واوڈا کو بطور وفاقی وزیر فوری کام سے
روکنے کی درخواست پر بھی نوٹس جاری کررکھا ہے ،چوبیس فروری کو بینچ کی عدم دستیابی پر سماعت بغیر کارروائی ملتوی کردی گئے تھی ،فیصل واوڈا پر کاغذات نامزدگی میں حقائق چھپانے کا الزام ہے ۔ درخواست میں کہاگیاکہ فیصل واوڈا کاغذات نامزدگی جمع کرواتے وقت دوہری شہریت رکھتے تھے، فیصل واوڈا نے الیکشن کمیشن میں دوہری شہریت چھوڑنے سے متعلق غلط بیانی کی۔ درخواست کے مطابق شہری میاں محمد فیصل نے فیصل واوڈا کیخلاف درخواست دائر کررکھی ہے۔
