اسلام آباد (نیوز ڈیسک) مسلم لیگ (ن) کے صدر اور قومی اسمبلی میں اپوزیشن لیڈر شہباز شریف نے بھی نعیم الحق کی وفات پر اظہار افسوس کیا۔انہوں نے نعیم الحق کے اہل خانہ اور پی ٹی آئی سے اظہار تعزیت کرتے ہوئے کہا کہ اللہ تعالیٰ مرحوم کے درجات بلند فرمائے۔

واضح رہے کہ وزیراعظم عمران خان کے قریبی دوست اور معاون خصوصی برائے سیاست نعیم الحق70برس کی عمر میں انتقال کرگئے ہیں،وزیر اعظم عمران خان ،صدر مملکت عارف علوی،وزیر خارجہ شاہ محمود قریشی، چیرمین سینٹ صادق سنجرانی، ڈپٹی چئیرمین سینٹ سلیم مانڈوی والا، سپیکر قومی اسمبلی اسد قیصر،ڈپٹی سپیکر قاسم سوری سمیت وفاقی و صوبائی وزراء، گورنرز،وزراء اعلی ،بلاول بھٹو زرداری،چوہدی شجاعت،پرویزالہی اور دیگر رہنماؤں نے نعیم الحق کے انتقال پر دکھ اور افسوس کا اظہار کیا ہے اور سوگوار خاندان سے اظہار ہمدردی کرتے ہوئے مرحوم کی روح کے ایصال ثواب کیلئے دعا کی ہے ۔ گورنر سندھ عمران اسماعیل نے نعیم الحق کے انتقال کی تصدیق کی اور اس حوالے سے افسوس کا اظہار کیا۔ایک بیان میں گورنر سندھ کا کہنا ہے کہ نعیم الحق کے انتقال پر افسوس کا اظہار کرتا ہوں، نعیم الحق وزیراعظم کے قریبی دوست اور پارٹی کا اثاثہ تھے۔ وفاقی وزیر سائنس اینڈ ٹیکنالوجی نے بھی نعیم الحق کے انتقال کے حوالے سے سماجی رابطے کی ویب سائٹ پر پیغام جاری کیا ہے۔