کراچی(این این آئی)محمود آباد میں شادی کی تقریب میں کھلے عام ہوائی فائرنگ کی ویڈیو منظر عام پر آگئی، پاکستان تحریک انصاف کے ایم پی اے بلال غفار نے فائرنگ کرنے والوں کی گرفتاری کا مطالبہ کر دیا۔ تفصیلات کے مطابق محمود آباد کے علاقے میں دولہا کی اپنے دوستوں کے ہمراہ ہوائی فائرنگ کرتے کی ویڈیو منظر عام پر آگئی، ذرائع نے بتایا ہے کہ فائرنگ کرنے والے دولہا اور اسکے دوستوں کا تعلق سیاسی جماعت سے ہے،پی ٹی آئی ایم پی اے بلال غفار نے فائرنگ کرنے والوں کی گرفتاری کا مطالبہ کیا ہے،
بلال غفار کا کہنا ہے کہ اگر کسی غریب کی شادی ہوتی تو بارات ہی جیل پہنچ جاتی، سندھ کی مافیا سیاسی جماعت کے کارکنوں نے فائرنگ کرکے لوگوں میں خوف و ہراس پھیلایا ہے، جدید اسلحے کا آزادانہ استعمال پولیس کی کارکردگی پر سوالیہ نشان ہے، بلال غفار نے مزید کہا ہے کہ سندھ میں پیپلز پارٹی کے کارکنان کے الگ اور غریبوں کے لئے الگ قانون ہے، ان کا مزید کہنا تھا کہ میں آئی جی سندھ، ایڈیشنل آئی جی کراچی اور ڈئی آئی جی ایسٹ سے مطالبہ کرتا ہوں کے فائرنگ کے واقعے میں ملوث تمام افراد کو گرفتار کیا جائے۔
