اسلام آباد (مانیٹرنگ ڈیسک )سابق وزیر اعظم شاہد خاقان عباسی نے ملک میں جاری آٹا بحران پر کہاہے کہ نیا پاکستان ہے لوگ روٹی کھانا چھوڑ دیں ، مسئلہ ختم ہو جائے گا ، نئے پاکستان کیلئے ووٹ دیا اب عوام بھگتیں ، 70 روپے کلو آٹا بک رہاہے۔

حکومت کا ہر دن عوام پر بھاری ہوگا ۔احتساب عدالت میں پیشی کے موقع پر صحافی نے سوال کیا کہ عمران خان کہتے ہیں میرا تنخواہ میں گزارہ نہیں ہو رہا ،جس پر شاہد خاقان عباسی نے کہا کہ تنخواہ بڑھا دی جائیں بہتر ہو گا لیکن عمران خان ٹیکس بھی ادا کریں ۔صحافی نے شاہد خاقان عباسی سے ایک اورسوال کرتے ہوئے کہا کہ مولانا کہتے ہیں اپوزیشن سے مایوس ہوں ، کیا آپ مایوس ہیں ؟ جس پر سابق وزیراعظم نے جواب دیتے ہوئے کہا کہ اپوزیشن لیڈر نے معاملات اٹھانے ہوتے ہیں ، اسمبلی چل ہی نہیں رہی، اسمبلی میں کوئی بات کریں تو سپیکر صاحب اجلاس ہی ختم کر دیتے ہیں ، اسمبلی میں صرف ایک بل بڑی عجلت سے پاس ہواہے ۔ الیکشن کمیشن کے ممبران کی تعیناتی کے معاملے پر شاہد خاقان عباسی نے کہا کہ الیکشن کمیشن ارکان کی تعیناتی پر بیٹھ کر بات کرنا اچھا ہے ۔اس سے پہلے شاہد خاقان عباسی کو آج ایل این جی کیس کی سماعت کیلئے احتساب عدالت میں پیش کیا گیا جہاں عدالت نے ان کے جوڈیشل ریمانڈ میں چار فروری تک مزید توسیع کر دی۔