اسلام آباد (این این آئی)پاکستان پیپلز پارٹی پارلیمنٹرینز کی سیکریٹری اطلاعات ڈاکٹر نفیسہ شاہ نے سابق صدر پرویز مشرف کی سزا کیخلاف لاہور ہائی کورٹ کے فیصلے پر تعجب کا اظہار کرتے ہوئے کہا ہے کہ لاہور ہائی کورٹ کا فیصلہ سوالیہ نشان، قانون کی حکمرانی کے لئے افسوسناک دن ہے۔ ایک بیان میں نفیسہ شاہ نے کہا کہ سپریم کورٹ کی طرف سے تشکیل دی گئی کورٹ تین ہائی کورٹ کے جج صاحبان پر مشتمل تھی۔ فیصلے کے خلاف سپریم کورٹ سے رجوع کیا جاتا نہ کہ ہائیکورٹ سے، لاہور ہائی کورٹ کا فیصلہ سوالیہ نشان ہے۔

انہوں نے کہا کہ عوام کے منتخب وزیراعظم شہید ذوالفقار علی بھٹو جس نے پاکستان بچایا تھاکے عدالتی قتل کے حوالے سے ریفرنس آٹھ سال سے شنوائی کا منتظر ہے جبکہ ایک آئین شکن ڈکٹیٹرکی اپیل کا فیصلہ چند دنوں میں ہونا حیران کن بات ہے۔ انہوں نے کہا کہ کہ شہید بینظیر بھٹو کو سرعام شہید کیا گیا مگر کسی ایک قاتل کو عدالت نے سزا کیوں نہیں دی؟،قوم پوچھ رہی ہے کہ شہید ذوالفقار علی بھٹو اور محترمہ بینظیر بھٹو شہید کو انصاف کون دے گا؟۔ انہوں نے کہا کہ سانحہ 12مئی کے اہم کردار بھی ابھی تک گرفتار نہیں ہوئے۔