اسلام آباد (این این آئی) پاکستان مسلم لیگ (ن) کی ترجمان مریم اورنگزیب نے پارٹی مرکزی سیکریٹریٹ پر ایف آئی اے چھاپے کی مذمت اور شدید احتجاج کرتے ہوئے مرکزی سیکریٹریٹ پر چھاپے کے خلاف مسلم لیگ (ن) جمعہ کو بھرپور احتجاجی ریلی نکالنے کا فیصلہ کیا ہے۔ ایک بیان میں انہوں نے کہاکہ قانون کی دھجیاں اْڑا کر چھاپے پر واجد ضیاء کے خلاف ڈکیتی کا مقدمہ درج کرانے کا فیصلہ کیا ہے۔

انہوں نے کہاکہ پارٹی سیکریٹریٹ پر ایف آئی اے کے چھاپے سے بشیر احمد میمن کی کہانی سچ ثابت ہوگئی ہے۔انہوں نے کہاکہ سابق ڈی جی ایف آئی اے نے عمران صاحب کے دباؤ میں نہ آئے اور نالائق اور نااہل عمران صاحب کا آلہ کار بننے سے انکار کردیاتھا۔انہوں نے کہاکہ نوازشریف کے خلاف بدنام زمانہ ’ہیروں‘ کو ہی پھر سے استعمال کرنے کا فیصلہ کیاگیا۔انہوں نے کہاکہ چھاپے سے ثابت ہوگیا کہ جج ارشد ملک کی وڈیو اصلی ہے۔انہوں نے کہاکہ چھاپے سے یہ بھی ثابت ہوگیا کہ جج ارشد ملک نے دباو کے تحت نوازشریف کو سزا سنائی تھی۔انہوں نے کہاکہ مسلم لیگ (ن) کے مرکزی سیکریٹریٹ پر چھاپہ نالائق اور ناہل عمران صاحب کے کہنے پر مارا گیا۔انہوں نے کہاکہ کرپشن کے جھوٹے مقدمات کے ثبوت نہیں مل رہے تو ایف آئی اے کو اب دباؤ کے لئے استعمال کیا جا رہا ہے۔انہوں نے کہاکہ حکومت عدلیہ کے فیصلوں پر اپنا غصہ مسلم لیگ (ن) سیکریٹریٹ پر بلاجواز چھاپے ماکر نکال رہی ہے۔انہوں نے کہاکہ پارٹی مرکزی سیکریٹریٹ پر حملہ عمران نیازی حکومت کی شدید بوکھلاہٹ اور حواس باختگی کا ثبوت ہے۔انہوں نے کہاکہ افسوس کا مقام ہے کہ سیاسی جماعتوں کے دفاتر کو بھی سیاسی انتقام کے تحت پامال کیاجارہا ہے۔انہوں نے کہاکہ سیاسی انتقام پر مبنی جھوٹے مقدمات کے بے نقاب اور عدلیہ سے مسترد ہونے پر عمران نیازی صاحب بدحواس ہوچکے ہیں۔انہوں نے کہاکہ پارٹی مرکزی سیکریٹریٹ پر چھاپے سے ہمارے حوصلے پست ہوں گے نہ ہم سچ بولنا چھوڑیں گے۔انہوں نے کہاکہ عمران صاحب اختیارات کا ناجائز استعمال کرتے ہوئے ایک اور قومی ادارے کو سیاست میں الجھا رہے ہیں۔انہوں نے کہاکہ جب نیب نیازی گھٹ جوڑ ناکام ہو رہا ہے اور عدالتوں میں ثبوت پیش نہیں ہو رہے تو ایف آئی کو استعمال کیا جا رہا ہے۔