اسلام آباد (این این آئی) وزیراعظم کے ترجمان ندیم افضل چن نے کہاہے کہ یہ ہمارے ملک کا المیہ ہے کہ پردے کے پیچھے سیاست ہوتی ہے، آرمی چیف کی مدت ملازمت میں توسیع پر تمام جماعتوں کا اتفاق تھا۔
ان کی ملازمت کی مدت میں توسیع کا قانونی مسودہ جلد منظر عام پر آجائیگا۔ایک انٹرویو میں انہوں نے کہاکہ اپوزیشن سے ہر معاملے پر مذاکرات کررہے ہیں اور امید ہے کہ یہ ہمارا ساتھ دیں گے۔وزیراعظم کے ترجمان نے کہا کہ احتساب کا نظام کمزور ہے، جیلوں میں ہزاروں بے گناہ افراد قید ہیں۔انہوں نے کہاکہ میڈیکل رپورٹس کی بنیاد پر ہی مریض کو ریلیف دیا جاتا ہے۔ندیم افضل چن کا کہنا تھا کہ عدلیہ کی آزادی پر یقین رکھنا چاہیے تاہم عدالتی نظام میں اصلاحات کا حامی ہوں۔ترجمان وزیراعظم ندیم افضل چن نے کہا کہ وثوق سے کہتا ہوں نیب کا ادارہ آزاد ہے۔فارن فنڈنگ کیس کے حوالے سے گفتگو کرتے ہوئے انہوں نے کہاکہ یہ معاملہ الیکشن کمیشن میں چل رہا ہے، الیکشن کمیشن کا معاملہ بھی اپوزیشن کی معاونت سے حل ہوجائے گا۔وزیراعلیٰ پنجاب کے متعلق وزیراعظم کے ترجمان ندیم افضل چن نے کہا کہ عثمان بزدار جنوبی پنجاب سے منتخب کیے گئے ہیں لیکن یہ بات سمجھنے کی ضرورت ہے کہ وزیراعلیٰ تن تنہا صوبے میں بہت سے معاملات کو نہیں دیکھ سکتا اس کیلئے ایک ٹیم ہوتی ہے۔
