اسلام آباد (مانیٹرنگ ڈیسک)آرمی چیف جنرل قمر جاوید باجوہ کی مدت ملازمت میں توسیع کا نوٹی فکیشن معطل ہونے کے بعد سوشل میڈیا پر تبصرے شروع ہو گئے۔ اس حوالہ سے مائیکروبلاگنگ ویب سائٹ ٹویٹر پر اپنے پیغام میں سینئرکالم نگار سلیم صافی نے حکومت کو تنقید کا نشانہ بناتے ہوئے پوچھا کہ کیا آپ کو تبدیلی پسند آئی؟
انہوں نے اپنے پیغام میں کہا کہ جب نظام سے نابلد دانتوں کے ڈاکٹر اور ذاتی تابعدار صدر مملکت کے منصب پر بیٹھے ہوں، جب ایسا شخص وزیراعظم بنایا گیا ہو جس نے ساری زندگی صرف کرکٹ کھیلی اور گالیاں دی ہوں، جب ایسے جونیئر شخص کو پرنسپل سیکرٹری بنایا جائے جنہوں نے ساری ملازمت وفاق کی بجائے صوبوں میں کی ہو، جب ایسے شخص کو وزیر قانون بنایا جائے جنہیں قانون سے زیادہ اپنی وزارت یا پھر پرویز مشرف کو بچانے کی فکر ہو اور جب کابینہ کو مسخروں ، چاپلوسوں اور سیاسی نابالغوں سے بھردیا گیا ہو۔تو پھر اہم ترین نوٹیفکیشن کے ساتھ یہ سلوک تو ہوتا رہے گا۔ انہوں نے کہا کہ تبدیلی کا مزہ تو بہت آرہا ہوگا؟ کوئی کسر رہ گئی ہو تو کچھ عرصہ کے لئے باکسر عامر خان کو وزیراعظم بنا دیتے ہیں ۔دوسری جانب نجی ٹی وی کے مطابق سپریم کورٹ کی جانب سے آرمی چیف کی مدت ملازمت میں توسیع کا نوٹیفکیشن معطل کئے جانے کے بعد وزیراعظم عمران خان کوعدالتی فیصلے سے آگاہ کردیاگیا،ذرائع کاکہناہے کہ وزیراعظم عمران خان کوعدالتی کارروائی سے متعلق بریفنگ دی گئی،وزیراعظم کوسپریم کورٹ میں اٹھائے گئے قانونی نکات سے آگاہ کیاگیا،ذرائع کا کہنا ہے کہ وزیراعظم نے قانونی ٹیم کوآئینی جواب تیارکرنے کی ہدایت کردی ہے ۔
