کوئٹہ (آن لائن) پشتونخواملی عوامی پارٹی کے سربراہ محمود خان اچکزئی نے کہا ہے کہ عام انتخابات میں بڑے پیمانے پر دھاندلی ہوئی ہے اگر ملک کے حالات کو صحیح ٹریک پر لانا ہے تو فوری طورپر شفاف انتخابات کرائے جائیں پاکستان اس وقت اقتصادی طورپر مشکل میں ہے مہنگائی بے روزگاری انتہائی کو پہنچ گئی اگر عوام کے جائز مطالبات تسلیم نہیں کئے گئے تو  ملک کا بہت نقصان ہوگا قوموں کو حقوق دینے ہونگے اور قوموں کو اپنے وسائل پر اختیار دینا ہوگا

ان خیالات کا اظہار انہوں نے نجی ٹی وی چینل سے بات چیت کرتے ہوئے کیا محمود خان اچکزئی نے کہا کہ ہم ملک میں آئین اور قانون کی حکمرانی چاہتے ہیں اب وقت آگیا ہے کہ تمام ادارے اپنی حدود میں رہ کر ایمانداری سے کام کریں تو ملک ترقی کر سکتا ہے پارلیمنٹ ملک کا بالادست ادارہ ہے اور تمام تر پالیسیاں پارلیمنٹ میں ہونی چاہئیں جب تک پارلیمنٹ کو بااختیار نہیں بنایا جاتا اس وقت تک ہم اپنی پالیسیوں کو بہتر نہیں کرسکتے ہم آئین کے دائرے میں رہ کر بات کرتے ہیں کہ حکمران کو چاہئے کہ وہ آئین اور قانون کی حکمرانی کو مدنظر رکھ کر فیصلے کریں غلط فیصلوں سے مزید مسائل پیدا ہونگے محمودخان اچکزئی نے کہا کہ 2018ء کے انتخابات میں بہت بڑی دھاندلی ہوئی ہے اور آج حکومت کے اتحادی اس کا خود اعتراف کررہے ہیں کہ عام انتخابات میں دھاندلی ہوئی ہے اب بھی وقت ہے کہ اپنی ناکامیوں اور غلطیوں کو تسلیم کریں تو اس سے  حالات خراب ہونے کے بجائے مزید بہتر ہو سکتے ہیں اگر ناکامیوں کو تسلیم نہیں کیا تو نیا طوفان آئے گا اور پھر کوئی بھی اس طوفان کو نہیں روک سکتا اس وقت ملک کے حالات گھمبیر ہوتے جارہے ہیں اور پاکستان اقتصادی طورپر مشکل میں ہے اگر عوام حکمرانوں کے خلاف سڑکوں پر نکل پڑیں تو حالات مزید خراب ہو سکتے ہیں اس وقت مہنگائی بے روزگاری انتہاء پر پہنچ گئی غلط سیاست کی وجہ سے ملک تنہائی کا شکار ہے ہمسایہ ممالک کے ساتھ حالات ٹھیک نہیں محمود خان اچکزئی نے کہا کہ جن کے ساتھ تعلقات بہتر ہونے چاہئے ان کے ساتھ نہیں کررہے اور جب تعلقات بہتر نہیں چاہئے ان کے ساتھ تعلقات بہتر کرنے کے لئے منت سماجت کررہے ہیں انہوں نے کہا کہ ہماری چادر اور پگڑی کا مذاق نہ بنایا جائے تو ہم سے خطرناک کوئی نہیں ہوگا انہوں نے کہا کہ قوموں حقوق اور ان کے وسائل پر انہیں اختیار دینا چاہئے۔