اسلام آباد (مانیٹرنگ ڈیسک) اڈیالہ جیل میں سزائے موت کے قیدی نے علاج کے لیے چیف جسٹس اسلام آباد ہائی کورٹ کو خط لکھ دیا، ایک نجی ٹی وی چینل کی رپورٹ کے مطابق خادم حسین جو کہ اڈیالہ جیل میں سزائے موت کے قیدی ہیں انہوں نے اپنے خط میں چیف جسٹس سے استدعا کی ہے کہ اسے بینائی کا مسئلہ ہے، آنکھوں کے علاج کے لیے سہولت دی جائے۔ سزائے موت کے قیدی کی درخواست پر چیف جسٹس اطہر من اللہ نے درخواست کو رٹ پٹیشن میں
تبدیل کرنے کا حکم دیا ہے اور فوری انصاف کی فراہمی یقینی بنانے کے لیے اسے کل سماعت کے لئے مقرر کر لیا ہے۔ قیدی کی درخواست پر چیف جسٹس اسلام آباد ہائیکورٹ نے چیمبر سماعت میں وفاقی حکومت سے جواب طلب کرتے ہوئے ایڈووکیٹ جنرل کو بھی نوٹس جاری کر دیا ہے۔واضح رہے کہ میاں نواز شریف کی بیماری کی بنیاد پر رہائی کا فیصلہ مثال بن گیا ہے اور اسی بناء پر سزائے موت کے قیدی نے بھی علاج کے لیے درخواست دے دی ہے۔
