لاہور(این این آئی)تعلیمی اداروں میں تعطیل کا اعلان،تمام نجی و سرکاری ادارے بند رہیں گے، تفصیلات کے مطابق صوبائی دارالحکومت لاہور اور گردونواح میں شدید سموگ کے باعث آج بروز (جمعہ) کو تمام نجی و سرکاری تعلیمی ادارے بند رہیں گے۔اس حوالے سے محکمہ سکول ایجوکیشن نے باضابطہ نوٹیفکیشن جاری کردیا۔
محکمہ سکولز ایجوکیشن نے شدید فضائی الودگی کے باعث لاہور، فیصل آباد اور گوجرانوالہ کے سرکاری اور نجی سکولوں میں مورخہ 22 نومبر بروز جمعہ کو تعطیل کا اعلان کر دیا ہے۔سرکاری اعلان کے بعد تمام تعلیمی ادارے جمعہ کو بند رہیں گے۔ دریں اثناء چیف ٹریفک ا?فیسر لاہورکیپٹن(ر)لیاقت علی ملک نے کہا کہ فوگ اور سموگ میں احتیاطی تدابیر اپنانے سے محفوظ سفر کو یقینی بنایا جا سکتا ہے۔موسمی حالات کو مدنظر رکھتے ہوئے شہری دھند میں فوگ لائٹس کے استعمال کو یقینی بنایا جائے۔ ڈرائیورزدھند میں مناسب رفتار سے سفر کریں۔ اوورٹیکنگ اورگاڑی کو مین روڈ پر پارک کرنے سے اجتناب کیا جائے۔بوقت ضرورت گاڑی کو سڑک کی انتہائی بائیں لین میں ہی پارک کیا جائے۔ گاڑیوں کو چاروں انڈیکٹرز چلتے رہنے دیں۔دھند میں چلتی گاڑی سے ہاتھ اور منہ نکالنے سے مکمل اجتناب کیا جائے۔گاڑی کے فرنٹ اور بیک ویو مرر پر اوس نہ جمنے دیں۔ٹریکٹرٹرالی،ریڑھا اور دیگر سلوموونگ گاڑیوں کے پیچھے ریفلیکٹرز لازمی لگائیں۔ان کا مزید کہنا تھا کہ سٹی ٹریفک پولیس او ر محکمہ ماحولیات کی مشترکہ ٹیمیں دھواں چھوڑنے والی گاڑیوں کیخلاف کارروائی کر رہی ہیں،رواں ماہ کے دوران6353جبکہ رواں سال کے دوران مجموعی طور پر 36ہزار سے زائد گاڑیوں کیخلاف کارروائی کی جا چکی ہے،ان کا کہنا تھا کہ شہری سموگ کے دوران مکمل احتیاط برتیں۔سموگ کے دوران عینک اور ماسک کا استعمال کریں۔انہوں نے کہاکہ سٹی ٹریفک پولیس کی ایجوکیشن ٹیمیں مختلف سکول،کالجز،یونیورسٹز،بس اڈاوں اور ٹرانسپورٹ دفاتر میں شہریوں کو دوران ڈرائیونگ احتیاطی تدابیر اپنانے بارے بریف کر رہی ہیں۔
