لاہور( این این آئی )پاکستان مسلم لیگ (ن) کے صدر و قائد حزب اختلاف محمد شہباز شریف نے کہا ہے کہ نوازشریف کیلئے نیک جذبات اور ہمدردی کا اظہار کرنے پر حکومت کی اتحادی (ق) لیگ اورایم کیو ایم کا شکریہ ادا کرتے ہوئے کہا ہے
کہ چوہدری شجاعت حسین ،چوہدری پرویزالٰہی اور چیئرمین سینیٹ صادق سنجرانی کے شکر گزار ہیں۔ اپنے بیان میں انہوں نے کہاکہ حکومت کی اتحادی جماعتوں نے نوازشریف کیلئے انسانی ہمدردی کا اظہار کیا،اے این پی اور پیپلزپارٹی کے بھی بے حد مشکور ہیں جنہوں نے نوازشریف کیلئے نیک خواہشات اور جلد صحتیابی کیلئے پیغامات بھجوائے۔ انہوں نے کہا کہ پاکستان کے 22کروڑ عوام ، اپوزیشن کی جماعتوں اور حکومتی اتحادیوں کی جانب سے نوازشریف کی جلد صحتیابی کیلئے دعا ئوں پر ان کے مشکور ہیں۔نوازشریف کی ملک و قوم کیلئے گراں قدر خدمات ہیں،نواز شریف کی پاکستان میں عدم موجودگی پر ان کو مشن کو جاری رکھیں گے ،نوازشریف کی صحت پر ان تمام سیاسی جماعتوں نے انسانیت سے ہمدردی کا ثبوت دیا ہے۔ انہوں نے کہا کہ حکومت کی اتحادی جماعتوں نے دشمنی کی سیاست کی بجائے مفاہمت اور انسانی بنیادوں کی سیاست کو فروغ دیا ہے،تمام اتحادی جماعتوں نے انسانی ہمدردی کی مخالفت کرنے والوں کی حوصلہ شکنی کی ہے۔
