لاہور( این این آئی )پاکستان مسلم لیگ (ن) کے صدر محمد شہباز شریف نے کہا ہے کہ محمد نوازشریف کی صحت پر قوم سمیت ہم سب سخت فکر مند ہیں، نوازشریف کی صحت کی بہتری ہماری اولین ترجیح ہے،سیاسی مخالفت رہتی ہے لیکن کسی کے زندہ رہنے کے حق سے انکار نہیں کیاجاسکتا ۔
اپنے بیان میں انہوںنے کہا کہ نوازشریف کا قانونی حق ہے کہ انہیں بہترین علاج میسرآئے، ساری پارٹی، ہر کارکن اور عوام ان کی صحت چاہتے ہیں،خون لگانے کے باوجود محمد نوازشریف کے پلیٹ لیٹس کی تعداد بڑھ نہیں رہی ہے جو تشویشناک امر ہے ،اس بیماری کی نوعیت اور لاحق خطرات کے پیش نظر محمد نوازشریف کی رپورٹس بیرون ملک بھجوا دی گئی ہیں ، محمد نوازشریف کی صحت سے متعلق کسی غفلت کے متحمل نہیں ہوسکتے۔انہوںنے کہا کہ محمد نوازشریف کے لئے فکرمندی، دعائوں اور نیک جذبات اور تمنائوں پر قوم اور کارکنان کا تہہ دل سے شکرگزار ہوں ۔حکومتی وزراء اور مشیروں کا انداز بیان انتہائی نامناسب اور قوم کے دل زخمی کررہا ہے،عمران نیازی صاحب اپنے وزیروں ،مشیروں کو بتائیں کہ تلوار کا زخم بھر جاتا ہے لیکن زبان کا زخم نہیں بھرتا،سیاسی مخالفین کی بیماریوں اور رنج کا مذاق اڑانے والے نہ بھولیں وقت بدل جاتا ہے۔انہوں نے پاکستان قوم سے اپیل کی ہے کہ نواز شریف کی صحت یابی کیلئے دعا کریں ۔
