اسلام آباد(آن لائن)جمعیت علماء اسلام(ف) نے وفاقی حکومت کی جانب سے انصار الاسلام پر پابندی لگانے کے فیصلے کو عدالت میں چیلنج کرنے کا اعلان کیا ہے،قانونی ٹیم سے مشاورت شروع کر دی ۔جے یو آئی کے مرکزی رہنما حافظ حسین احمد نے کہا ہے کہ انصارالاسلام پر پابندی لگانے کے حوالے خبریں میڈیا سے کے ذریعے موصول ہو رہی ہیں اگر ان خبروں میں صداقت ہوئی اور فیصلے پر عملدرآمد ہوا تو ہم عدالت سے رجوع کریں گے ۔
ان کا کہنا تھا کہ انصار الاسلام جے یو آئی کی رضاکار تنظیم کے طورپر الیکشن کمیشن میں رجسٹرڈ ہے یہ تنظیم آج پہلی بار منظر عام پر نہیں آئی ،پہلے سے جلسے جلوسوں میں سکیورٹی انتظامات سرانجام دے رہی ہے۔واضح رہے کہ حکومت نے جمعیت علماء اسلام (ف) کی ملیشیا فورس انصارالاسلام کے خلاف کارروائی کا فیصلہ کیا ہے، وزارت داخلہ نے انصار الاسلام کو کالعدم قرار دینے کی سمری الیکشن کمیشن اور وزارت قانون کو بھجوائی تھی۔
