اسلام آباد (این این آئی)پاکستان مسلم لیگ(ن) کے رہنما محمد زبیر نے دعویٰ کیا ہے کہ پارٹی کی مرکزی نائب صدر مریم نواز سے جیل میں غیرمتعلقہ سوال کیے جا رہے ہیں۔ایک انٹرویومیں انہوں نے بتایا کہ نوازشریف کی صاحبزادی سے قید کے دوران صرف سیاسی سوالات پوچھے جارہے ہیں۔
ن لیگی رہنما کے مطابق 42 دن قید کے دوران پوچھا گیا کہ آپ سیاست چھوڑ کیوں نہیں دیتی، آپ سیاست میں کیوں ہیں۔محمد زبیر نے بتایا کہ مریم نواز پر جو الزام لگائے گئے اس کے متعلق ایک بھی سوال نہیں پوچھا گیا۔ انہوںنے کہاکہ مفتاح اسماعیل اور شاہد خاقان عباسی سے بھی اسی قسم کی تفتیش ہو رہی ہے۔انہوں نے بتایا کہ حکومت سمیت سب مانتے ہیں کہ احتساب ہونا چاہیے لیکن سیاسی انتقام کا تاثر بھی نہیں دینا چاہیے۔محمد زبیر نے کہاکہ نیب قانون سے بالاتر نہیں ہے، اس ادارے کو بھی قوانین کی پاسداری کرنی ہوگی، اگر آپ گرفتار کرتے ہیں تو الزامات بھی ثابت کرنے ہوں گے۔(ن )لیگی رہنما نے کہا کہ سب مانتے ہیں کہ نیب کا قانون ٹھیک ہونا چاہیے تاہم ڈیڑھ سال سے اسکے اطلاق کا بھی مسئلہ بنا ہوا۔محمد زبیر کے مطابق نیب اپنی حدود پامال کر رہا ہے، کابینہ نے اعتراف کیا ہے نیب کی وجہ سے معیشت سکڑ چکی ہے اور بیوروکریٹس فیصلہ نہیں کر رہے۔
