اسلام آ باد (مانیٹرنگ ڈیسک)وفاقی حکومت نے رواں مالی سال کے لیےمزید کفایت شعاری اور بچت اقدامات کرتے ہوئے وزارتوں ، ڈویژنوں ، محکموں اورسرکاری تنظیموں پر ہر قسم کی نئی گاڑیوں کی خریداری پر پابندی عائد کر دی ہے تاہم موٹرسائیکل کی خریداری کو استثنیٰ حاصل ہوگا ۔

گاڑیوں پر پابندی تمام موجودہ اور ترقیاتی اخراجات کے لیے بھی ہوگی،روزنامہ جنگ کے مطابق وزارت خزانہ کے جاری میمورنڈم میں سرکاری محکموں کوہدایات جاری کر دی گئی ہیں جن کا اطلاق فوری طور پر کر دیا گیا ہے، میمورنڈم کے مطابق ترقیاتی منصوبوں اور مجاز اتھارٹی کی منظوری کے علاوہ ہرقسم کی نئی اسامیوں کی تخلیق پر پابندی عائد کر دی گئی ہے ، مجاز افسران کو صرف ایک اخبار ، میگزین تک محدود کر دیا گیا ہے ، سرکاری اداروں کے پرنسپل اکائونٹنگ افسران بجلی ، گیس ، ٹیلی فون ، پانی وغیرہ کے بلوں ، اثاثہ جات کی خریداری کے اخراجات ، مرمتی کاموں اور دیگر آپریشنل اخراجات کو کم سے کم سطح پر رکھنے کو یقینی بنائیں اور مالی سال کے لیے مختص کردہ بجٹ کے اندر رہتے ہوئے کم سے کماخرجات کریں ، یہ ہدایت بھی کی گئی ہے کہ سرکاری خط وکتابت کے لیے کاغذ کی دو نوں اطراف کو استعمال میں لایا جائے، وزارتوں ، ڈویژنوں ، محکموں اور سرکاری تنظیموں کے ناگزیرضروریات کو پورا کرنے لیے ایک کفایت شعاری کمیٹی تشکیل دے دی گئی ہے جو صرف ضروری ، ناگزیر صورت میں گاڑیوں کی خریداری اور نئی پوسٹوں کی تخلیق سے متعلق تجاویز کا جائزہ لے گی ،کفایت شعاری کمیٹی کے چیئرمین ایڈیشنل فنانس سیکریٹری (اخراجات )ہونگے ۔یاد رہے کہ جب پی ٹی آئی اقتدار میں آئی تھی تو وزیر اعظم عمران خان نے کفایت شعاری کرنے کا اعلان کیا تھا۔

موضوعات:کفایت شعاری مہم