لاہور(این این آئی)پاکستان مسلم لیگ (ن) کے صدر محمد شہباز شریف کی صدارت میں پارٹی کا اہم مشاورتی اجلاس منعقد ہوا جس میں ملک کی مجموعی سیاسی صورتحال، کشمیر ایشو،مہنگائی، نیب کی گرفتاریوں سمیت دیگر امور پر تفصیلی تبادلہ خیال اور آئندہ کی حکمت عملی پر غور کیا گیا، مسلم لیگ (ن) نے عوامی رابطہ مہم تیز کرنے کا فیصلہ کر لیا۔
ماڈ ل ٹاؤن میں منعقدہ اجلاس میں احسن اقبال، سردار ایاز صادق، رانا تنویر حسین، مریم اورنگزیب، کیپٹن (ر) محمد صفدر،انجینئر خرم دستگیر، پرویز ملک، شائستہ پرویز ملک سمیت دیگر شریک ہوئے۔ اجلاس کے شرکاء نے بھارت کی جانب سے کشمیر کی خصوصی حیثیت ختم کرنے اور نہتے کشمیریوں پر مظالم کی شدید مذمت کرتے ہوئے کہا کہ پوری پاکستانی قوم اپنے کشمیری بھائیوں کیساتھ ہے اور انہیں کسی صورت تنہا نہیں چھوڑا جائے گا۔ اجلاس کے شرکاء نے نیب کی گرفتاریوں کی شدید الفاظ میں مذمت کرتے ہوئے کہا کہ احتساب کے نام پر اپوزیشن کو بد ترین انتقام کا نشانہ بنایا جارہا ہے لیکن ہم حکومت کے آگے سر نہیں جھکائیں گے۔ اجلاس سے خطاب کرتے ہوئے شہباز شریف نے کہا کہ مسلم لیگ (ن) کسی خوف اور فکر کے بغیر کسان، صنعت کار اور غریب کی آواز بنے گی۔عوامی رابطہ مہم مزید تیزہوگی اور اس کے تحت ورکرز کنونشنزمنعقد ہونگے۔ مہنگائی، بیروزگاری، بجلی اورگیس کی قیمتوں میں ہوشربا اضافے نے عوام سے جینے کا حق چھین لیا ہے۔تاجر، صنعتکار، دکاندار اور مزدور کے حقوق کی جنگ پوری قوت سے لڑیں گے۔ شہباز شریف نے کہا کہ یوم آزادی یوم یکجہتی کشمیر کے طور پر بھرپور انداز سے منایا جائے گا،کشمیریوں سے مکمل یکجہتی کے اظہار کے لیے 14 اگست کو لاہور میں پرچم کشائی کی تقریب منعقد کی جائے گی۔انہوں نے کہا کہ حکومت کشمیر، معیشت سمیت قومی اور عوامی معاملات پر اپنی تاریخی ناکامیوں کو اپوزیشن کی گرفتاریوں سے چھپانا چاہتی ہے۔
گیارہ ماہ میں تاریخ کا سب سے زیادہ 31.8 کھرب کا قرض ناکام حکومت کا معاشی جرم ہے۔آئی ایم ایف اور ٹیکس وصولیوں کے اہداف میں مکمل ناکامی سے قومی مفادات کو سنگین خطرات لاحق ہیں۔ شہباز شریف نے کہا کہ جیل، ہتھکڑی، گرفتاری اور گالی ہمیں ناکام نیازی کے جھوٹ بے نقاب کرنے سے نہیں روک سکتی،اپوزیشن ملک و قوم کے مفادات کے لیے لئے ہر قربانی دینے کو تیار ہے۔ انہوں نے کہا کہ جوہری پروگرام سمیت قومی مفاد کے کسی معاملے میں سودے بازی نہیں ہونے دیں گے۔انہوں نے کہا کہ پاکستان مسلم لیگ (ن) کردارکشی اور انتقام کے ہتھکنڈے پہلے بھی بھگت چکی ہے،عوام نے ہمیشہ مسلم لیگ (ن)اور اس کی قیادت کے خلاف زہریلے پراپیگنڈے کو مسترد کیا اور اس پر ہمیشہ اعتماد کیا۔
