لاہور (آن لائن) سیشن عدالت نے شادی کے بعد جسم فروشی کروانے والے چینی شہری کی قید سے پاکستانی لڑکی کو بازیاب کروا کر اس کے بیان کی روشنی میں اسے والد کے ساتھ جانے کی اجازت دے دی۔ ایڈیشنل سیشن جج محمد نعیم شیخ نے کیس پر سماعت کی۔ درخواست گزار اشفاق نے اپنی بیٹی زرینہ بی بی کو اس کے چینی شوہر کی جانب سے حبس بے جا میں رکھے جانے اور بازیاب کروانے کی استدعا کی تھی۔
عدالتی بیلف نے اقبال ٹاون کے گھر سے لڑکی کو بازیاب کروا کو عدالت میں پیش کیا۔ لڑکی زرینہ بی بی نے عدالت کے روبرو بیان دیا کہ چینی لڑکے چوفیفا چونگ نے شادی کے بعد اس کی نازیبا ویڈیو بنا کر اسے بلیک میل اور اس سے جسم فروشی کروانا شروع کر دی۔ انکار پر اسے قید کر لیا۔ عدالت نے لڑکی کے بیان کی روشنی میں اسے اس کے والد کے ساتھ جانے کی اجازت دے دی۔
