اسلام آباد(اے این این ) تحریک انصاف کے دو بڑے رہنمائوں شاہ محمود قریشی اور جہانگیر ترین کے درمیان اختلافات کوئی نئی بات نہیں۔عمران خان کے کون زیادہ قریب ہے؟ اس بات پر شاہ محمود قریشی اور جہانگیر ترین کے درمیان 2013 کے انتخابات کے بعد ہی اختلافات شروع ہو چکے تھے جو کئی مواقع پر کھل کر سامنے آتے رہے۔ کئی مواقع پر عمران خان نے مداخلت کرکے دونوں رہنمائوں کے درمیان صلح کرائی ۔

لیکن اس بار وزیراعظم عمران خان خاموش ہیں۔تحریک انصاف کے ذرائع کے مطابق شاہ محمود قریشی کے مقابلے میں جہانگیر ترین کو وزیراعظم کا اعتماد حاصل ہے۔ یہی وجہ ہے تحریک انصاف کے متعدد رہنمائوں نے کھل کر جہانگیر ترین کی حمایت کی ہے۔واضح رہے کہ پارٹی میں انہی دونوں رہنماوں کی وجہ سے دو الگ اور واضح گروپس ہیں اور ان میں اختلافات وقتا فوقتا سامنے آتے رہتے ہیں۔