اسلام آباد(نیوزڈیسک)پاک بھارت کشیدگی میں اضافہ کے بعدپاکستان میں موجود امریکی اہلکاروں پر مزید سکیورٹی پابندیاں لگا دی گئیں،تفصیلات کے مطابق امریکی وزارتِ خارجہ نے پاکستان اور انڈیا کے درمیان بڑھتی کشیدگی کے پیشِ نظر پاکستان میں موجود اپنے حکومتی اہلکاروں پر مزید سکیورٹی پابندیاں لگا دیں ہیں

اور ان کی نقل و حرکت محدود کر دی ہے۔ یاد رہے کہ امریکی حکومت نے پہلے ہی یکم اگست 2018 سے اپنے شہریوں کو پاکستان میں غیر ضروری سفر کرنے کے حوالے سے متنبہ کر رکھا ہے۔دریں اثناء چینی وزارت خارجہ نے کہا ہے کہ پاکستان اور بھارت سے کشیدگی ختم کریں ۔ترجمان وزارت خارجہ لو کنگ نے ریگولر میڈیا بریفنگ کے دوران کہا کہ پاکستان فوج کے ترجمان کے مطابق پاکستان نے بھارت کے دو جنگی طیاروں کو مار گرایا ہے۔ انہوں نے کہاکہ1971کی جنگ کے بعد پہلی بار بھارتی جنگجوں نے ایک روز قبل سرحدی حدود کی خلاف ورزی کی۔چینی وزارت خارجہ کے ترجمان نے کہا کہ ہم نے دونوں ملکوں سے طاقت کا مظاہرہ نہ کرنے کی درخواست کی ہے۔علاوہ ازیں بھارتی حملے کے بعد آئی ایس پی آر کی ٹیم نے صحافیوں کو بالا کوٹ کا دورہ کرایا اور بریفنگ دی۔ بدھ کو آئی ایس پی آر کی ٹیم نے صحافیوں کو بالا کوٹ کے مضافاتی علاقے کنگڑ نالہ کا دورہ کرایا اور پاک فوج کے کرنل شاہد نے صحافیوں کو بریفنگ دی۔ انہوں نے کہا کہ پاک فضائیہ نے دشمن کے طیاروں کو بھاگنے پر مجبور کردیا۔کرنل شاہد نے بتایا کہ جاتے ہوئے بھارتی طیاروں نے چار میزائل آف لوڈ کیے۔ صحافیوں نے دو گھنٹے تک متاثرہ جگہ کا مشاہدہ کیا۔ جہاں صرف چار گڑھے پڑے تھے اور کچھ درخت گرے ہوئے تھے۔اس کے علاوہ علاقے میں دور دور تک آبادی نہیں ہے۔ صرف ایک کچا مکان تھا جس میں دراڑیں پڑ گئی تھیں۔

موضوعات:پاک بھارت کشیدگی