دی ہیگ(این این آئی) عالمی عدالت میں کلبھوشن کیس میں پاکستان نے جوابی دلائل دیتے ہوئے کہا ہے کہ بھارت نے کلبھوشن جادیو کی شہریت کا ہی اعتراف نہیں کیا تو قونصلر رسائی کا مطالبہ کیسا؟ پاکستان دہشت گردی کے خلاف جنگ لڑ رہا ہے، بھارت کی مداخلت اور دہشت گردی کے باعث ہزاروں پاکستانی شہید ہوئے،کلبھوشن جادیو بھارتی خفیہ ایجنسی را کے لئے کام کر رہا تھا جسے بلوچستان، خصوصاً گوادر اور کراچی میں دہشت گردی کرانے کے لیے بھیجا گیا تھا،
کلبھوشن جادیو نے پاکستان میں دہشت گردی کے لیے مقامی ذرائع استعمال کیے،پاکستان نے کلبھوشن یادیو کو وہ تمام حقوق دیے جو جنیوا کنونشن کے تحت اس کا حق ہے، پاکستان نے انسانی بنیادوں پر جادیو کی والدہ اور اہلیہ کو ملاقات کی اجازت دی،پاکستان کے خلاف بھارت کی منصوبہ بندی ڈھکی چھپی نہیں،بھارت اور کلبھوشن کا اس سماعت سے کوئی تعلق نہ ہونے کا بھارتی مؤقف مضحکہ خیز ہے، حسین مبارک کے پاسپورٹ پر درج پتے کی جائیداد کلبھوشن کی ماں کی ملکیت ہے،کلبھوشن جادیو کے معاملے کا ایران سے کوئی تعلق نہیں ہے ، اسے بلوچستان سے گرفتار کیا گیا ہے۔ منگل کو عالمی عدالت انصاف میں بھارتی جاسوس کلبھوشن جادیو کیس کی سماعت کے دوران پاکستان کے وکلاء نے کہاکہ بھارت نے کلبھوشن جادیو کی شہریت کا ہی اعتراف نہیں کیا تو قونصلر رسائی کا مطالبہ کیسا؟گزشتہ روز عالمی عدالت انصاف میں بھارتی وکیل نے کلبھوشن جادیو سے متعلق دلائل دئیے تھے ۔سماعت کے آغاز پر اٹارنی جنرل آف پاکستان منصور علی خان نے دلائل دیتے ہوئے کہا کہ بھارت نے ہمیشہ پڑوسیوں کو عدم استحکام کا شکار کرنے کی کوشش کی جس کیلئے پڑوسی ممالک میں دہشت گردی کرائی گئی اور جاسوس بھیجے۔اٹارنی جنرل نے کہا کہ پاکستان دہشت گردی سے متاثر ہونے کے باوجود دہشت گردی کے خلاف جنگ لڑ رہا ہے،
بھارت کی مداخلت اور دہشت گردی کے باعث ہزاروں پاکستانی شہید ہوئے۔اٹارنی جنرل آف پاکستان نے کہا کہ کلبھوشن جادیو بھارتی خفیہ ایجنسی را کے لئے کام کر رہا تھا جسے بلوچستان، خصوصاً گوادر اور کراچی میں دہشت گردی کرانے کے لیے بھیجا گیا تھا۔ اٹارنی جنرل نے دلائل میں کہا کہ کلبھوشن یادیو نے مجسٹریٹ کے سامنے پاکستان میں دہشت گردی کی کارروائیوں سے متعلق بغیر کسی دباؤ کے اپنے جرائم کا اعتراف کیا اور پاکستان نے یقینی بنایا کہ
جادیو مرضی سے جو بیان دینا چاہے دے۔اٹارنی جنرل منصور علی خان نے کہا کہ پاکستان نے کلبھوشن یادیو کو وہ تمام حقوق دیے جو جنیوا کنونشن کے تحت اس کا حق ہے، پاکستان نے انسانی بنیادوں پر جادیو کی والدہ اور اہلیہ کو ملاقات کی اجازت دی۔اٹارنی جنرل نے کہا کہ کلبھوشن جادیو نے پاکستان میں دہشت گردی کے لیے مقامی ذرائع استعمال کیے اور سی پیک کو نقصان پہنچانے کے لیے بندرگاہوں کو خاص طور پر نشانہ بنایا گیا، کمانڈر یادیو کی سرگرمیاں انفرادی نہیں بلکہ بھارتی ایما پر ہوئیں۔
اٹارنی جنرل منصور علی خان نے کہا کہ پاکستان کے خلاف بھارت کی منصوبہ بندی ڈھکی چھپی نہیں، وہ پاکستان دشمن ملیشا کی فنڈنگ اور تربیت کر رہا ہے، پاکستان کو اب تک دہشت گردی سے 123 ارب ڈالر کا نقصان ہوچکا ہے۔پاکستان کی جانب سے وکیل خاور قریشی نے دلائل دیتے ہوئے کہا کہ گزشتہ روز بھارت نے کئی اہم سوالات کے جوابات نہیں دیئے۔خاور قریشی نے کہا کہ بھارت اور کلبھوشن کا اس سماعت سے کوئی تعلق نہ ہونے کا بھارتی مؤقف مضحکہ خیز ہے،
ایک طرف بھارت نے عالمی عدالت سے رجوع کیا اور دوسری طرف پاکستان کے سوال کا جواب دینے سے بھارت تحریری انکار کر چکا ہے۔پاکستان کے وکیل نے کہا کہ بھارت نے کمانڈر جادیو کی شہریت کا ہی اعتراف نہیں کیا تو قونصلر رسائی کا مطالبہ کیسے کر سکتا ہے؟۔خاور قریشی نے کہا کہ بھارت بتائے قونصلر رسائی معاہدے کا کلبھوشن پر اطلاق کیوں نہیں ہوتا، کلبھوشن جادیو کی شہریت سے متعلق ابھی تک فیصلہ نہیں کیا گیا، بھارت نے نہیں بتایا کہ وہ حسین مبارک پٹیل ہے یا
کلبھوشن جادیو، جب ایک شخص کی شناخت مصدقہ ہی نہیں تو قونصلر رسائی کیسی؟عالمی عدالت انصاف میں پاکستان کے وکیل نے کئی سوالات اٹھاتے ہوئے کہا کہ کلبھوشن جادیو کے پاس مسلمان نام سے پاسپورٹ کیوں موجود تھا، کلبھوشن کو ایران سے پاکستان اغوا کر کے لانے کے الزام کا کیا ثبوت ہے، ایران سے پاکستان کے 9 گھنٹے کے سفر کا بھارت کے پاس کیا ثبوت ہے، بھارت کا 47 سال کی عمر میں کلبھوشن کا ریٹائرمنٹ کا کہنا ناقابل فہم ہے۔خاور قریشی کی جانب سے عدالت میں
الیکٹرانک پریزینٹشن دی گئی اور کہا کہ حسین مبارک پٹیل کے نام پاسپورٹ 2003 میں جاری ہوا جس کی تجدید 2014 میں کی گئی، حسین مبارک کے پاسپورٹ پر درج پتے کی جائیداد کلبھوشن کی ماں کی ملکیت ہے۔خاور قریشی نے کہا کہ کلبھوشن جادیو کے معاملے کا ایران سے کوئی تعلق نہیں ہے، اْسے ایران سے نہیں بلوچستان سے گرفتار کیا گیا، اس کے ایران سے اغوا کی کہانی بے بنیاد ہے۔خاور قریشی نے دلائل کے دوران بھارتی قومی سلامتی کے مشیر اجیت دوول کے انٹرویو کا
حوالہ دیتے ہوئے کہا کہ اجیت دوول نے بلوچستان میں بھارتی دہشت گردی کا اعتراف کیا اور کہا کہ پاکستان بلوچستان سے ہاتھ دھو دے گا، اجیت دوول کے بقول کلبھوشن نے بلوچستان میں دہشتگردی میں اہم کردار ادا کیا اور کلبھوشن پاکستان کو عدم استحکام کا شکار کرنے کا ایک آلہ کار تھا۔خاور قریشی نے کہا کہ کلبھوشن کیس کے دوران بھارت نے ہمیشہ بداعتمادی کا مظاہرہ کیا۔پاکستانی وکیل نے بھارتی صحافی کیرن تھاپر اور پروین سوامی کی دی گئی رپورٹس کے حوالے دیئے اور کہا کہ
پروین تھاپر نے کلبھوشن کے ساتھ کام کرنے والے خفیہ ایجنسیوں کے اہلکاروں کے انٹرویوز کے حوالے دئیے۔پاکستان کے وکیل خاور قریشی نے کہا کہ میں ماضی میں بھارت کی نمائندگی بھی کر چکا ہوں، بھارت کا یہ رویہ میرے لیے بالکل نیا ہے۔نجی ٹی وی کے مطابق عالمی عدالت انصاف میں پاکستان کے ایڈہاک جج جسٹس ریٹائرڈ تصدق حسین جیلانی کی طبیعت خراب ہوگئی جس کے بعد پاکستان کی ایڈہاک جج تبدیل کرنے کی درخواست پر عدالت نے فیصلہ محفوظ کرلیا۔یاد رہے کہ
بھارت کو 20 فروری کو اپنا مؤقف دوبار ہ پیش کرنے کا موقع دیا جائے گا اور پھر پاکستان 21 فروری کو اپنے حتمی دلائل پیش کرے گا۔ یاد رہے کہ بھارتی خفیہ ایجنسی را کے جاسوس کلبھوشن جادیو کو 3 مارچ 2016 کو بلوچستان سے گرفتار کیا گیا تھا۔کلبھوشن پر پاکستان میں دہشت گردی اور جاسوسی کے سنگین الزامات ہیں اور بھارتی جاسوس تمام الزامات کا مجسٹریٹ کے سامنے اعتراف بھی کر چکا ہے۔10 اپریل 2017 کو کلبھوشن یادیو
کو جاسوسی اور کراچی اور بلوچستان میں تخریبی کارروائیوں میں ملوث ہونے پر سزائے موت سنانے کا اعلان کیا گیا تھا تاہم بھارت نے کلبھوشن جادیو کی سزائے موت کو عالمی ثالثی عدالت (آئی سی جے) میں چیلنج کرتے ہوئے سزا پر عمل درآمد رکوانے کی اپیل کی تھی۔عالمی عدالت نے کلبھوشن کی سزائے موت کے خلاف بھارت کی درخواست پر فیصلہ سناتے ہوئے کہا تھا کہ حتمی فیصلہ آنے تک کلبھوشن کو پھانسی نہیں دی جاسکتی۔
