لاہور( این این آئی)پاکستان مسلم لیگ (ن) کی ترجمان مریم اورنگزیب نے کہا ہے کہ وزیر اطلاعات فواد صاحب قوم کو بتائیں کہ وزیراعظم وہی گاڑیاں استعمال کررہے ہیں جو سابقہ وزیراعظم استعمال کررہے ہیں ،آپ کے کیا کہنے آپ تو بنی گالہ سے وزیراعظم ہاؤس ہیلی کاپٹر 55روپے فی کلومیٹر میں پہنچا سکتے ہیں

کیونکہ اس میں عمران صاحب جو سفر کرتے ہیں ۔ فواد چوہدری کے بیان پر رد عمل دیتے ہوئے انہوں نے کہا کہ اگر بجلی اور گیس کے بل ڈبل ہو گئے ہیں تو کوئی بات نہیں کیونکہ عمران صاحب وزیراعظم ہاؤس میں ایم ایس کے گھر میں رہتے ہیں ۔ انہوں نے کہا کہ فواد چوہدری صاحب عمران صاحب ننگے پاؤں سعودی عرب جاتے ہیں کوئی بات نہیں اگر حج کی خواہش رکھنے والوں کو مدینہ اور مکہ جانے سے محروم کر دیا گیا ہے ۔ایک کڑوڑ نوکریاں اور پچاس گھر نہ ملیں تو کوئی بات نہیں کیونکہ فواد چوہدری کی نوکری تو قائم ہوگی اور عمران صاحب کا غیر قانونی گھر تو ریگولرائز ہو گیا ہے ۔ انہوں نے کہا کہ حکومت عوام کو بتائے کہ منی لانڈرنگ کا 300ارب کب ملک واپس آئے گا ۔بے رحم حکومت نے مکہ اور مدینہ جانے کی پاکستانیوں کی خواہش بھی چھین لی ہے ۔عمران صاحب کے چہیتوں، ملٹی نیشنل کمپنیوں کے لئے سبسڈی حلال جبکہ غریب حاجیوں کے لئے حرام ہے۔پی ٹی آئی کی نااہل، ناتجربہ کار اور عوام دشمن حکومت نے عوام پر تاریخی بوجھ لاد ھ دیا ہے۔فواد چوہدری صاحب نے موجودہ حکومت سے مایوس ہوکر اگلی نوکری کی تلاش شروع کردی ہے ۔فواد چوہدری صاحب میڈیا کے ہزاروں ورکرز بیروزگار ہوچکے ہیں، تھوڑا وقت ان کے لئے بھی نکالیں۔ مریم اورنگزیب نے کہا ہے کہ وزیر اطلاعات فواد صاحب قوم کو بتائیں کہ وزیراعظم وہی گاڑیاں استعمال کررہے ہیں جو سابقہ وزیراعظم استعمال کررہے ہیں