اسلام آباد (مانیٹرنگ ڈیسک) پاکستان کے مختلف حصوں میں زلزلے کے شدید جھٹکے محسوس کیے گئے، ایک نجی ٹی وی چینل کی رپورٹ کے مطابق زلزلے کی شدت ریکٹر سکیل پر 5.8 ریکارڈ کی گئی، زلزلے کی شدت کی وجہ سے لوگ گھروں سے نکل آئے، زلزلہ پیما مرکز نے زلزلے کی گہرائی 80 کلومیٹر ریکارڈ کی ہے، اسلام آباد، راولپنڈی، شیخوپورہ، سرگودھا، لاہور، میانوالی، ڈیرہ اسماعیل خان،چارسدہ، مالاکنڈ، چنیوٹ، ، پشاور، کشمیر ، بٹگرام، لوئر دیر، بنوں، صوابی، کوہاٹ اور گلگت بلتستان کے

علاوہ دیگر شہروں میں بھی زلزلے کے جھٹکے محسوس کیے گئے، کسی جانی و مالی نقصان کی کوئی اطلاع موصول نہیں ہوئی ہے، واضح رہے کہ اس سے قبل صبح شہر قائد میں 2.9شدت کے زلزلے کے جھٹکے محسوس کیے گئے ہیں۔زلزلہ پیما مرکز کے مطابق کراچی میں زلزلے کے جھٹکے محسوس کیے گئے ہیں، زلزلہ 12 بجکر 39منٹ پر ریکارڈ ہوا جس کی شدت ریکٹر اسکیل پر 2.9 ریکارڈ کی گئی جب کہ زلزلے کا مرکز کراچی کے قریب تھا اور زلزلے کی گہرائی 15 کلومیٹر ریکارڈ ہوئی ہے۔